Tarixdə ikinci, mərkəzi arenada ilk zəfər üçün
Bu gün Avropa Liqasında qrup mərhələsinin 4-cü turunun oyunları keçiriləcək. Azerisport.az xəbər verir ki, Azərbaycanın qitənin nüfuzuna görə ikinci dərəcəli klub turnirindəki yeganə təmsilçisi - son çempion "Qarabağ" da növbəti sınağına çıxacaq.
Xatırladaq ki, Ağdam klubu bu mövsüm avrokuboklar macərasına Çempionlar Liqasının ikinci təsnifat mərhələsindən başlayıb. Bölgə təmsilçisinin startdakı rəqibi Malta "Valletta"sıydı. "Qarabağ" bu rəqibini səfərdə 1:0, Bakıda isə 4:0 hesabı ilə üstələyərək, adını növbəti mərhələyə yazdırdı. Üçüncü təsnifat mərhələsində isə təmsilçimiz Avstriya "Zalsburq"una uduzaraq (2:1, 0:2), ÇL ilə vidalaşdı. Lakin qaydaya görə, ÇL-in pley-off mərhələsinə vəsiqə qazana bilməyən klublar mübarizəni Avroliqanın eyni mərhələsində davam etdirmək şansına malik idi. Çempionumuz məhz bu mərhələdə ünlü Hollandiya "Tvente"si ilə çətin sınaqdan üzüağ çıxaraq (evdə 0:0, səfərdə 1:1), tarixində ilk dəfə adını qrup mərhələsinə yazdırdı.
"Qarabağ"ın qrup mərhələsindəki rəqibləri İtaliya "İnter"i, Fransa "Sent-Etyen"i və Ukrayna "Dnepr"idi. İlk turdakı rəqib Fransa təmsilçisi idi. Bakıdakı həmin oyunda ağdamlılar "Sent-Etyen"dən daha yaxşı oynasa da, qolsuz heç-heçəyə razılaşmalı oldu. Digər "böyük beşlik" ölkəsi təmsilçisi - "İnter"lə görüşdə isə komandamız 0:2 hesablı məğlubiyyətlə üzləşdi. Ağdam təmsilçisi qrupundakı nəhənglərlə müqayisədə nisbətən zəif olan rəqiblə - "Dnepr"lə səfər qarşılaşmasında isə böyük bir sürprizə imza ataraq 1:0 hesablı qələbəyə sevindi. İndi təmsilçimizi bu komanda ilə Bakıda növbəti duel gözləyir.
1918-ci ildə yaranan "Dnepr" ev oyunlarını 31 min azarkeş tutumu olan "Dnepr Arena"da keçirir. Amma Ukraynadakı məlum olaylarla əlaqədar bu komanda Ağdam klubunu Kiyevdəki "Olimpiya" stadionunda qəbul edəcək. 90 milyon dollarlıq büdcəsi olan klub bu vaxta qədər Ukrayna çempionu olmayıb. Klubun əksər uğuruları SSRİ-nin vaxtına təsadüf edir. Belə ki, həmin dönəmdə "Dnepr" 2 dəfə SSRİ çempionu olub, 1 dəfə SSRİ Kubokuna, 1 dəfə SSRİ Super Kubokuna sahib çıxıb. İki dəfə ölkə çempionatının gümüş mükafatçısı olan "göy-ağlar", eyni sayda da bürünc medalları qazanıb. "Qarabağ"ın rəqibi 3 dəfə Ukrayna Kubokunda final oynayıb, 1 dəfə isə İntertoto Kubokunun finalına yüksəlib.
"Dnepr" ötən mövsümü ikinci pillədə başa vurduğu üçün Çempionlar Liqasının pley-off mərhələsinə vəsiqə qazanıb. Ancaq Danimarka "Kopenhagen"ini mübarizədən kənarlaşdıra bilməyən (evdə 0:0, səfərdə 0:2) ukraynalılar çıxışını Avropa Liqasının pley-offunda davam etdirməli olub. Avroliqanın pley-offunda isə "Dnepr" "Qarabağ"ın rəqibi olmaq üçün Xorvatiya "Hayduk"unu mübarizədən kənarlaşdırıb - evdə 2:1, səfərdə 0:0. Bu komanda qrup mərhələsindəki geridə qalan oyunlarında öncə "İnter"ə evdə 0:1 hesabıyla uduzub, "Sent-Etyen"lə səfər oyununda isə qolsuz heç-heçəyə nail olub. "Dnepr" Avroliqanın qrup mərhələsinə uğurlu başlamasa da, Ukrayna Premyer Liqasının cari mövsümündə çox uğurlu çıxış edir. Mövsümün geridə qalan 10 turunda 8 qələbə qazanan bu komanda sadəcə, 1 qarşılaşmada heç-heçə etmişdi və yalnız sonuncu turda Kiyev "Dinamo"suna evdə 0:3 hesabıyla uduzub. Rəqib qapılarından 22 top keçirən Dnepropetrovsk təmsilçisi öz qapısında 7 qol görüb.
Maraq üçün bildirək ki, 2006/07 mövsümündə Ağdam klubunun şərəfini qorumuş Sergey Kravçenko hazırda "Dnepr"da çıxış edir. Komandanın Yevgeni Konoplyanka, Bruno Qama kimi liderləri də var. Klubun prezidenti İqor Kolomoyski, baş məşqçisi Miron Markeviçdi. 63 yaşlı mütəxəssis bu ildən "Dnepr"i çalışdırır.
Göründüyü kimi, "Qarabağ"ın rəqibi zəif komanda hesab oluna bilməz. Bu üzdən də komandamızın "Dnepr"lə oyunda növbəti dəfə uğur qazanması üçün böyük güc sərf etməsinə ehtiyac var. Qurban Qurbanovun yetirmələri maksimum diqqətli oynamaqla, ələ düşən qol fürsətlərinin hər birini dəyərləndirməklə ikinci qələbəsinə imza ata bilər. Təbii ki, ağdamlıların hətta heç-heçəyə nail olması da uğurlu nəticə sayılacaq. Amma qarşılaşma Bakıda keçiriləcəyinə görə, səfərdə keçirilmiş oyunda qələbə qazanıldığı üçün komandamız bu dəfə də sözügedən rəqibini məğlub etməyə borcludu. Bu, "Qarabağ"ın qrupdan çıxmaq şanslarını artırması baxımından da vacib əhəmiyyət daşıyır. Güman ki, bunun vacibliyini komanda üzvləri də çox yaxşı dərk edirlər.
Sonda onu da bildirək ki, "Qarabağ"ın Avroliqada qazandığı istənilən uğur Azərbaycanın UEFA-dakı klub reytinqinə də təsirsiz ötüşmür. Belə ki, Ağdam klubunun hər bir qələbəsi ölkəmizə 0,500, heç-heçə isə 0,250 reytinq xalı qazandırır. Hazırda Azərbaycan UEFA reytinqində 53 ölkə arasında 29-cu pillədədi və hesabında 12.000 reytinq xalı var. Bunun 3.125 xalı cari mövsümdə qazanılıb (1.750 xal "Qarabağ"ın, 0.750 xal "İnter"in, qalan 0.625 xal isə "Neftçi"nin sayəsində əldə olunub).
"Qarabağ" hazırda UEFA-nın klub reytinqində 9.400 xalla 164-cüdü. "Dnepr" isə 33.733 xalla 59-cu pillədə qərarlaşıb.
Qeyd edək ki, F qrupu çərçivəsindəki digər oyunda "Sent-Etyen" "İnter"i qəbul edəcək.
Avropa Liqası
F qrupu
6 noyabr
21:00. Qarabağ - Dnepr
Hakimlər: Pavel Gil, Pyotr Sadçuk, Marçin Borkovski, Konrad Sapela.
Əlavə hakim köməkçiləri: Pavel Raçkovski, Kristof Yakubik.
Hakim-inspektor: Vladimir Antonov (Moldova).
Bakı. Tofiq Bəhramov adına Respublika stadionu.
