Ramiz Məmmədov: Millini indiki məqamda əcnəbiyə tapşırmaq mənasız olar
Azərbaycanın veteran futbolçusu Ramiz Məmmədovun azerisport.az saytına müsahibəsi
- "Qarabağ"ın Avropa Liqasındakı çıxışını necə qiymətləndirə bilərsiz?
- Klubumuzun belə bir turnirin qrup mərhələsində çıxış etməsi məni çox sevindirir. Onların qrup mərhələsində də uğurlu çıxışı ikiqat sevindiricidi.
- Ukrayna "Dnepr"i ilə sabahkı oyundan nə gözləyirsiz?
- "Qarabağ"ın Ukraynadakı gözlənilməz qələbəsi mənim üçün də xoş oldu. Mən daha çox heç-heçə gözləyirdim. Sabahkı oyunda da uğur gözləyirəm.
- Artıq qrupdan çıxmaq haqda düşünə bilərik?
- "Dnepr" üzərindəki mümkün qələbə klubumuzun pley-off mərhələsinə vəsiqə qazanmaq şanslarını artıracaq. Belə oyunla hətta Fransa "Sent-Etyen"i ilə səfər oyununda da uğur gözləmək olar. Ümid edirəm ki, "Qarabağ" qrup mərhələsindən sonra da Avroliqada qalacaq.
- Berti Foqtsun istefasını necə qarşıladız?
- Foqtsun boş-boş açıqlamaları onu gülməli vəziyyətə salmışdı. Onun yığmamızı AÇ-nin final mərhələsinə çıxaracağına dair verdiyi sözə başqa ad vermək də olmur. Onun verdiyi vədi heç Aleksa Ferqyusson, Arsen Venger, Joze Mourinyo də həyata keçirə bilməzdi. Yığmamızın hətta seçmə mərhələ öncəsi də belə bir şansı yox idi. Düzdü, ölkə futbolu inkişaf edir, amma o dərəcədə yox. O, bu cür açıqlamaları ilə Azərbaycan xalqını aldadırdı.
- Bəs onu kiminlə əvəzləməliyik?
- Mən onun yerində yerli məşqçi görmək istərdim. Artıq AÇ-2016-nın seçmə mərhələsinə çıxmaq şansımızı itirmişik. Belə bir vəziyyətdə ona əcnəbi əvəzləyici tapmağın mənasız olduğunu düşünürəm.
- Kimi məsləhət görürsüz?
- Kifayət qədər namizəd var. Nazim Süleymanov, Yunis Hüseynov, Vəli Qasımov, Ağasəlim Mircavadov, Şahid Diniyev, İqor Ponomaryov. Yerli məşqçilərə şans vermək lazımdı. Onların Foqtsdan pis olacağını düşünmürəm. Əksinə, daha yaxşı olar.
- Siz son vaxtların ən məşhur simasının adını qeyd etmədiz...
- Fikrimcə, indiki məqamda Qurban Qurbanova toxunmaq olmaz. Onun "Qarabağ"la uğuru bütün ölkəni sevindirir. Qoy öz işini davam etdirsin. Onun da zamanı gələcək.
