Vaqif Cavadov: Norveçlə oyun bizim üçün tsiklin ən vacib görüşü olacaq
Futbol üzrə Azərbaycan yığmasının və Türkiyənin "Qaziantep BB" klubunun hücumçusu Vaqif Cavadovun azerisport.az saytına müsahibəsi
- "Qaziantep BB" mövsümdə ilk qələbəsini qazandı. Bu barədə nə deyə bilərsiz?
- Təəssüf ki, ilk qələbəmizi çox gec qazandıq. Bu görüşə ciddi hazırlaşmışdıq. Komandamız meydanda sonadək döyüşdü.
- İki zərbəniz dirəkdən dönsə də, bir qol vurmağı bacardız...
- Şadam ki, komandama kömək edə bildim. Bütün qol vəziyyətlərimi dəyərləndirə bilməməyimə görə təəssüflənirəm. Əsas 3 xal qazanmaq idi ki, ona da nail olduq. Qarşıda bizi "Osmanlıspor"la daha çətin oyun gözləyir.
- Rəhman Hacıyev niyə heyətdə yox idi?
- O, xəstələnmişdi. Hacıyev növbəti tura hazır olacaq.
- Yenidən milliyə qaytarılmağınızla bağlı nə deyə bilərsiz?
- Yığmada oynadığıma görə şadam. Oynadım, oynamadım, ürəyim həmişə bu komandanın yanındadı. Mənimlə yanaşı Hacıyevi də çağırıblar. Böyük məmnuniyyətlə komandamıza kömək etməyə gələcəyik.
- Amma komanda yoldaşınız Ufuk Budak dəvət almadı...
- O, çağırılmadığını mənə dedi. Şübhəsiz ki, məyus olmuşdu. Amma bildirdi ki, növbəti toplanışlara dəvət gözləyəcək. Mənə sadəcə, təsəlli vermək qaldı.
- Noyabrın 9-da yığmamız U-21 ilə üz-üzə gələcək...
- Bəli, bundan xəbərim var. Həmin gün Türkiyədə tur var. Yalnız ondan sonrakı gün Bakıya gələcəyik.
- Norveçlə görüşdən nə gözləyirsiz?
- Çətin oyun olacaq. Komandamızda son dövrlərdə baş verənlər öz təsirini göstərə bilər. Amma istənilən halda meydana qələbə üçün çıxacağıq. Bu, tsikldəki ən vacib oyunlarımızdan biridi. Fasilə ərəfəsində yaxşı nəticə qazanmağımız lazımdı.
- Bu oyun Mahmud Qurbanov üçün də vacib oyundu...
- Ona kömək etməliyik. Yığmanın sükanı arxasındakı ilk oyunu olacaq. İlk növbədə ölkəmiz və Qurbanov üçün qələbə qazanmalıyıq.
- Deyilənə görə, yığmamızın baş məşqçisi olacaq mütəxəssis də bu oyunu izləyəcək...
- Düşünmürəm ki, bu, futbolçuları maraqlandırsın. Bizim üçün Norveçə qalib gəlmək vacibdi. Ondan sonra nə olacağını zaman göstərəcək.
