Ruslan Abışov: Mahmud Qurbanovun yerli futbolçuları yaxşı tanıması Norveçlə görüşdə bizə kömək edə bilər
Futbol üzrə Azərbaycan yığmasının və "Qəbələ"nin müdafiəçisi Ruslan Abışovun azerisport.az saytına müsahibəsi
- "Araz Naxçıvan" Premyer Liqadakı fəaliyyətini dayandırdığını bəyan edib. Bundan isə bu komanda ilə oyunlarda altı xal qazanmış "Qəbələ" böyük ziyan görəcək...
- Bu xəbər mənim üçün gözlənilməz oldu. Altı xalın çıxılması çox üzücü olar. Naxçıvan kimi bölgənin peşəkar klubunun olmaması da üzücü məqamlardandı.
- Son turda da "Bakı"ya qalib gələ bilmədiz...
- "Bakı" o qədər də zəif komanda deyil ki, bu xal itkisinə görə özümüzü öldürək. Onların gənc və təcrübəli futbolçulardan təşkil olunmuş yaxşı komandaları var. İndi bu komandaya qalib gəlmək o qədər də asan deyil. Ola bilsin ki, bizə bu oyunda qələbə qazanmağı çox istəməyimiz mane oldu. Demək olar ki, bütün oyun üstünlüyümüz şəraitində keçdi, amma son nöqtəni qoymağı bacarmadıq.
- Ötən tur əsas heyətdə meydana çıxmışdız, son matçda ikinci yarıda. Bunun səbəbi var?
- Var. Bir aylıq zədədən sonra "Araz Naxçıvan"la qarşılaşmada əsas heyətdə meydana çıxdım. Həmin oyunda fiziki cəhətdən komanda yoldaşlarımdan geri qaldığımı hiss etdim. Bu üzdən də "Bakı" ilə oyunun ikinci hissəsində meydana çıxmağım düzgün qərar idi. Artıq hər şey qaydasındadı.
- Qeyri-sabit çıxış edən "Qəbələ"dən bu mövsüm nə gözləmək olar?
- Sizin hiss edib-etmədiyinizi bilmirəm, amma komanda son turlarda çox artırıb. Demək olar ki, yeni komanda qurulub. Zamanla siz daha yaxşı oynayan "Qəbələ" görəcəksiz.
- Yığmamızın AÇ-2016-nın seçmə mərhələsi çərçivəsində Norveçə qarşı oyun üçün heyəti açıqlanıb və siyahıda sizin də adınız var...
- Buna şadam. Bu oyuna bəlkə də hamıdan çox mən gözləyirəm. Çünki seçmə mərhələ çərçivəsində İtaliya və Xorvatiyaya qarşı oyunları buraxmalı oldum. Mahmud Qurbanovun dəvət göndərdiyi futbolçuların siyahısına baxmışam. Xoşuma gəldi. Qurbanov azərbaycanlı futbolçuları yaxşı tanıyır və bu amil Norveçlə oyuna işimizə yaraya bilər.
