Sadıq Sadıqov: Neftçi hələ öz adına layiq oyun sərgiləmir
"Neftçi"nin prezidenti Sadıq Sadıqovun azerisport.az saytına müsahibəsi
- AZAL üzərindəki böyük hesablı qələbə ilə bağlı nə deyə bilərsiz?
- Komandanın belə inamlı qələbəsini görmək həmişə xoşdu. Biz rəqibdən bir qədər güclü idik. Amma qələbə asanlıqla başa gəlmədi. Bu komandalar arasındakı oyunlar həmişə maraqlı alınır. AZAL yaxşı oynadı, amma ilk qoldan sonra vəziyyət dəyişdi.
- Oyunçuların belə bir matça motivasiya olunması çətin deyildi?
- Oyundan öncə futbolçularla söhbət etmişdim, demişdim ki, bu görüş ən vacib qarşılaşmalardan biridi. Çünki qarşıda çempionata kiçik fasilə veriləcək. Hər kəs belə bir fasiləyə yaxşı əhval-ruhiyyədə yollanmaq istəyər. Qazandığımız qələbəyə baxmayaraq, bizim hələ daha çox çalışmağımız lazımdı.
- Komandanız artıq ikinci pillədədi...
- Hələ ikinci dövrə yeni başlayıb. İndidən nəsə demək tezdi. Qarşıda 25 oyun var. Bu oyunlardan maksimum xal toplamağa çalışmalıyıq.
- Geridə qalan 11 turu "Neftçi" üçün necə dəyərləndirə bilərsiz?
- Bizim gücümüz hər kəsə məlumdu. Yaxşı komandamız var. Amma biz hələ öz adımıza layiq oyun sərgiləmirik. Düzdü, turnir cədvəlindəki mövqeyimiz qənaətbəxşdi. Amma mən daha artığını gözləyirəm. Bəzi amillər var ki, bizə mane olur. Bunlar da daxili məsələlərdi.
- Məsələn?
- Onlardan danışmayacam. Bunlar klubun daxilində qalmalıdı.
- Maliyyə məsələlərini nəzərdə tutursuz?
- Söhbət hər şeydən gedir.
- Arif Əsədovun işi sizi qane edir?
- Əgər onunla çalışırıqsa, deməli, qane edir. "Neftçi"nin müdafiə futbolu oynadığını düşünmürəm. AZAL-la oyunda özünüz də gördüz ki, komanda bütün oyunu hücumda keçirdi. Daha çox qol vura bilərdik.
