Fəhmin Muradbəyli: Biz növbəti mərhələyə vəsiqə qazanacağımıza inanırıq

Noyabr ayında Azərbaycanın 19 yaşadək futbolçulardan ibarət Azərbaycan yığmasını AÇ-nin seçmə mərhələ oyunları gözləyir. Azerisport.az xəbər verir ki, Macarıstanda keçiriləcək qrupumuzun oyunlarında rəqiblər meydan sahibləri ilə yanaşı Slovakiya və Sloveniya olacaq. Seçmə mərhələ oyunları öncəsi komandamızın aparıcı oyunçularından olan Fəhmin Muradbəyli suallarımızı cavablandırıb.

- Yığmamızı seçmə mərhələyə hazır saymaq olar?
- Bəli, hazırıq. Hazırda bütün diqqətimiz bu oyunlara yönəlib.

- Seçmə mərhələ ərəfəsində Makedoniyaya qarşı yoxlama oyunu sizi yormadı?
- Yorğunluq olduğunu düşünmürəm. Seçmə mərhələyə Almaniyada hazırlaşmışıq, yaxşı formadayıq. Ayın 3-də Makedoniyaya yollanacağıq. Heç bir yorğunluq yoxdu.

- Qrupdakı rəqiblərimizi necə dəyərləndirərdiz?
- Çox güclü rəqiblərdi. Hər bir oyuna ciddi yanaşmalıyıq. Amma onların birinə qalib gələ bilərik.

- Həyəcan var?
- Xeyr. Səbrsizliklə oyunları gözləyirik. Uğur qazanmaq üçün əlimizdən gələni edəcəyik.

- Macarıstanla ilk oyun nə dərəcədə vacibdi?
- Biz macarları iki il əvvəl Qazaxıstandakı Prezident Kubokunda iş başında görmüşdük. Geridə qalan müddətdə onlar da güclənib, biz də. Amma onları məğlub edə bilərik.

- İndiki U-19-u tarixinin ən yaxşısı saymaq olar?
- Bu, yalnız özümüzdən asılıdı. Yaxşı nəticə qazana bilsək, bunu deməyə haqqımız çatar.

- Baş məşqçi Nikolay Adam komandanın qarşısına hansı hədəfi qoyub?
- Növbəti mərhələyə keçəcəyimizə inanırıq. Buna baş məşqçimiz də inanır. Bu barədə söhbətimiz olub.

- "Neftçi"də niyə forma şansı qazana bilmirsiz?
- Hər şey baş məşqçidən asılıdı. O, hələ mənim belə oynamağımı istəyir. Məşqçimizin bu barədə qərarına hörmətlə yanaşıram.