Mahmud Qurbanov: Norveç ilə oyun üçün heyəti müəyyənləşdirməmişəm
Futbol üzrə Azərbaycan yığmasının müvəqqəti baş məşqçisi Mahmud Qurbanovun azerisport.az saytına müsahibəsi
- Cavid İmamverdiyevin oyununu izləmək üçün Türkiyəyə getmişdiz. "Elazığspor"un "Samsunspor"a qarşı oyunundan nə nəticə çıxara bildiz?
- Cavidin oyununa baxdım. O, cəmi bir hissə meydanda oldu. Normal oynadı. Bütövlükdə, xoş təəssürat yaratdı.
- Onun milliyə çağırılacağını gözləmək olar?
- Heyəti hələ müəyyənləşdirməmişik.
- Öncədən demişdiz ki, legionerlərdən yalnız Dmitri Nazarovu dəvət edəcəksiz. Hələ də həmin fikrinizdəsiz?
- Belə deyim də: milliləşdirilmiş futbolçulardan hansılar əsas komandamıza dəvət alırdılarsa, onlar hələ də yığmamızın üzvləridi.
- Son oyunlara çağırılmayan Toğrul Erat barədə düşüncəniz necədi? O, yenidən "Fortuna"nın əsas heyətinə qayıdıb və ikinci Bundesliqa görüşlərində meydana çıxır...
- Biz ölkədən kənarda çıxış edən bütün futbolçularımızı izləyirik. Amma dediyim kimi, hələ heyətlə bağlı yekun qərarımızı verməmişik.
- İspaniya La Liqasında çıxış edən Eddi İsrafilovun yığmamıza dəvət alması nə dərəcədə inandırıcıdı?
- Düzünü deyim ki, məndə onunla bağlı heç bir məlumat yoxdu. Yığmanın qapısının hər kəsin üzünə açıq olduğunu demişəm. Hansı futbolçu yığmamıza dəvət almağa layiqdisə, çağıracağıq. Qalanı isə onların özünü necə göstərməsindən asılıdı.
- Norveçlə oyun üçün heyəti nə vaxt açıqlayacaqsız?
- Noyabrın 2-dən sonra. Ayın 4-dən etibarən isə məşqlərə başlayacağıq.
- Eşitdiyimizə görə, iki mərhələli toplanış keçirmək istəyirsiz: birincidə geniş heyətlə, ikincidə isə sırf oyun üçün seçdiyiniz futbolçularla...
- "Qarabağ"ın gələn həftə Avropa Liqasında oyunu var. Xaricdə çıxış edən futbolçularımızın da klubları növbəti oyunlarına çıxacaqlar. Ona görə də ilk günlərdən tam heyətlə məşq etməyimiz mümkünsüz görünür.
- Norveç barədə hansısa informasiya toplaya bilmisiz?
- Bizdə bu rəqib barədə kifayət qədər məlumat var. Hazırda daha çox növbəti oyunu düşünürük. Əlimizdən gələni edirik ki, qarşıdakı oyunda özümüzü yaxşı tərəfdən göstərə bilək.
