İbrahim Üzülməz: Qurban Qurbanov Azərbaycan millisinə kömək edəcək məşqçidi

Futbol üzrə Türkiyə yığmasının və "Beşiktaş" klubunun sabiq müdafiəçisi İbrahim Üzülməzin azerisport.az saytına müsahibəsi

- Berti Foqtsun Azərbaycan yığmasını tərk etməsindən xəbəriniz var?
- Əlbəttə, bilirəm ki, bu yaxınlarda komandanızla yollarını ayırıb.

- AFFA hazırda ona əvəzləyici axtarışındadı. Sizə təklif gəlsə, millimizi çalışdırmağa razılaşarsız?
- Məmnuniyyətlə. Çünki Azərbaycan mənim ikinci vətənimdi. Vətəndən gələn təklifdən imtina etmək olar?

- Foqts 7 ilə yaxın idi yığmamızın sükanı arxasındaydı. Sizcə, onun gedişi düzgün addımdı?
- Nəticələr o qədər də ürəkaçan deyil. Ona görə də onun postunda qalmasının daha düzgün olmasından danışmaq artıq olardı. Fikrimcə, indiki məqamda onun gedişi ən düzgün addımdı.

- Sizə belə bir təklif gəlsə, yığmamızı uğura daşımaq üçün neçə il vaxt lazım olar?
- Dəqiq bilirəm ki, altı il vaxt lazım olmazdı. Sizdə də yaxşı futbolçular var, onlarla uğur qazanmaq olar. Sadəcə, onlara düzgün yanaşma lazımdı. İndi hər bir komanda nəticə qazana bilir. Millinizə futbolçuları başa düşəcək məşqçi lazımdı.

- Sizcə, yığmamız yerli məşqçiyə tapşırılmalıdı, ya əcnəbiyə?
- Fikrimcə, yerli mütəxəssisə. Çünki o, yerli futbolçuları hamıdan daha yaxşı tanıyacaq. Belə olan halda yığmanız uğur qazana bilər.

- Yığmamıza hazırda müvəqqəti olaraq məhz yerli mütəxəssis təyin olunub və Norveçlə oyuna komandanı o çıxaracaq...
- Ona uğurlar arzulayıram. Həm Azərbaycan, həm də Türkiyə yığmasını yerli mütəxəssislər çalışdırmalıdı.

- Əksər azarkeşlər millinin sükanı arxasında "Qarabağ"ın baş məşqçisi Qurban Qurbanovu görmək istəyir...
- "Qarabağ" çox yaxşı komandadı. Bilirəm ki, Avropa Liqasında çıxış edirlər və bu, bizi çox sevindirir. Qurbanovu da yaxşı tanıyıram. Bakıya nə vaxt gəlsəm, onunla görüşüb, oturub, söhbətləşirik. Məşqçi olaraq xarakterə malikdi, əsl peşəkardı və düzgün insandı. Məşqçi kimi gənc olsa da, artıq xeyli uğura imza atıb. Fikrimcə, Azərbaycan millisinə kömək edəcək şəxs məhz odu.