Mikel Alvaro: Liderliyi qorumaq üçün Neftçi üzərində qələbə vacibdi

"İnter"in yarımmüdafiəçisi Mikel Alvaronun azerisport.az saytına müsahibəsi

- "Neftçi" ilə oyundan nə gözləyirsiz?
- Bu, çox ciddi rəqibdi. Onlar da bizim kimi qarşılarına böyük hədəflər qoyublar.

- Bu görüşü sizin üçün xüsusi hesab etmək olar?
- Biz indi birinci yerdə gedirik. Liderliyi qorumaq üçün bu görüşdə qələbə qazanmağa borcluyuq. Bu baxımdan təbii ki, vacib qarşılaşmadı.

- "İnter" "Neftçi"ni nəyin sayəsində məğlub edə bilər?
- Fikrimcə, bizə sadəcə, öz oyunumuzu sərgiləmək lazımdı. Biz bu mövsüm layiqli şəkildə liderlik edirik. Amma əminəm ki, "Neftçi" də bizim əhvalımızı korlamağa çalışacaq.

- "Qarabağ" ehtiyatda qalan oyunu nəzərə alınmaqla, potensial liderdi. Bu, sizi narahat etmir?
- Xeyr. Bizim hələ onlarla üç oyunumuz var. Bu üzdən liderliyə görə narahat olmağa dəyməz. Bizə indi mümkün qədər diqqətli olmaq lazımdı ki, xal itkisi ilə üzləşməyək.

- "Simurq"la oyundakı xal itkisini unutmusuz?
- Bəli. Həmin oyunda biz daha yaxşı oynadıq və qələbə qazanmağa borclu idik. Bizim qol epizodlarımız "Simurq"la müqayisədə daha çox idi.

- Bombardirlər siyahısında sonadək ilk pillədə qalmaq sizin üçün nə dərəcədə vacibdi?
- Mənim üçün "İnter"in uğurlu çıxış etməsi daha vacibdi. Mənim neçənci yerdə olmağım ikinci dərəcəlidi.