Fedetski: Qarabağ ilə oyunda bizə hətta Messiylə Ronaldo da kömək edə bilməzdi
Ukraynanın "Dnepr" klubunun müdafiəçisi Artyom Fedetski Avropa Liqasının qrup mərhələsi çərçivəsində "Qarabağ"a qarşı keçirdikləri oyundan danışıb. Azerisport.az xəbər verir ki, o, 0:1 hesabıyla uduzduqları görüşdən sonra bunları söyləyib:
"Əlbəttə, faciəvi oynadıq. Əks-hücumda qol buraxdıq. "Qarabağ"ın müdafiədən oynayacağını bilirdik. Elə də oldu və bizi əks-hücumlarda yaxalamağa çalışdılar. İkinci hissədə biz məğlubiyyətdən qaçmağa çalışsaq da, qatar artıq getmişdi, gec idi. Hücumlar qursaq da, təhlükəli vəziyyətlər yarada bilmirdik.
Bu gün hətta Messi ilə Ronaldo da bizə kömək edə bilməzdi. Amma Zozulya olsaydı, 3 qol vurardı. 3:0 hesabıyla qalib gəlməyimiz normal olardı.
Avroliqada niyə qol vura bilmədiyimizi anlamıram. Baxmayaraq ki, çempionatda çoxlu qol vururuq. Avroliqada isə ardıcıl üçüncü oyunumuzu qolsuz keçirdik. "Qarabağ"ı yaxşı öyrənmişdik, onların "İnter" və "Sent-Etyen"ə qarşı necə oynadığından xəbərimiz vardı. Bizim məşqçilər bu komandanı yaxşı analiz etsə də, əks-hücumda qol buraxdıqdan sonra vəziyyəti düzəldə bilmədik.
"Qarabağ"ın xətrinə dəymək istəməzdim, amma bundan öncə qalib gəldiyimiz "Çernomorets" onlardan iki baş üstündü. "Çernomorets"ə də uduzduğumuz halda onları ikinci hissədə tam bağladıq və qələbə qazandıq. "Qarabağ"la oyunun ikinci hissəsində onları da meydanın rəqibə aid hissəsində bağlamışdıq. Amma qol vurmağı bacarmadıq.
Bu gün stadionda 3 min azarkeş vardı, onların da 2800-ü "Qarabağ" fanatları idi. Gülməlidi. Fikrimcə, Obolonda və ya Dinamoda oynasaydıq, daha yaxşı olardı, "Olimpiya" stadionunda oynayanda sanki özümüzü toplanışda hiss edirik. Elə bil ki, yoxlama oyunundaydıq.
Artıq Bakıdakı oyuna hazırlaşmalıyıq. Başa düşürük ki, orada anşlaq olacaq. "Qarabağ" qrupdan çıxmaq üçün əlindən gələni edəcək. Öz azarkeşləri qarşısındakı oyunda bu qələbənin təsadüfi olmadığını isbatlamağa çalışacaqlar.
Mümkündü ki, Bakıda dolu tribunalar qarşısında oynamaq bizim üçün daha yaxşı oldu. Bu məğlubiyyətin ədalətsiz olduğunu göstərməliyik. Bunu isə sözdə yox, meydanda isbatlamalıyıq. Heç-heçə heç kimə sərf etməyəcək. Bizim bir xalımız var, qarşıda isə cəmi üç oyun var. Bizdən asılı olan hər şeyi edəcəyik ki, pley-off mərhələsinə vəsiqə qazanaq".
