Kravçenko: Qarabağla oyunumuz asan olmayacaq
Ukraynanın "Dnepr" klubunun yarımmüdafiəçisi Sergey Kravçenko klubun rəsmi saytına müsahibə verib. Azerisport.az sizi həmin müsahibə ilə tanış edir.
- Öncə "Qarabağ"dakı karyeranız haqda danışardız...
- Bundan xeyli vaxt keçib. Komanda tam dəyişib. Mən oynadığım dövrdən sadəcə, bir futbolçu qalıb. Bu komandanın indiki gücünü müəyyənləşdirmək çox çətindi. Braziliyalılar aparıcı gücə malikdilər. Ümumiyyətlə, bu ölkələrin təmsilçiləri topla oynamağı çox sevirlər.
- Azərbaycan klubları üçün Avroliqanın qrup mərhələsinə vəsiqə qazanmaq ciddi uğurdu. Amma yəqin ki, artıq onlar daha ciddi uğurlar üçün çalışırlar...
- Əlbəttə. Mən "Qarabağ"ın "Sent-Etyen"lə oyununu izləmişəm, onlar çoxlu qol epizodları yaratdılar. Əminəm ki, bizim də onlarla oyunumuz asan olmayacaq.
- Bu komandada çıxış edərkən Bakıda yaşayırdız?
- Bəli. "Qarabağ" Ağdamı təmsil etsə də, komanda Azərbaycan paytaxtında məskunlaşmışdı. Bakı hələ o zaman məndə xoş təəəssürat yaradırdı. Deyirlər indi daha da gözəlləşib.
- Komandada sizə münasibət necə idi?
- Komanda yoldaşlarım məni çox yaxşı qəbul etdilər. Baş məşqçinin də inamını hiss edirdim. İlk dörd turda üç qol vurmağa nail oldum. Onlardan birini "Neftçi"yə vurmuşdum. Hətta mətbuatda mənim Azərbaycan yığmasında oynamağım müzakirə mövzusuna çevrilmişdi. Yerli pasport almaq üçün mənə bir ay vaxt lazım idi.
- Razılaşmadız?
- Xeyr. Çünki öz ölkəmin yığmasında oynamağı arzulayırdım.
- "Qarabağ"la hansısa əlaqəniz qalıb?
- Klubda hələ də bir mütəxəssis işləyir. O, əvvəllər mətbuat xidmətində çalışırdı, indi isə aparıcı menecerdi. Yaxınlarda onunla söhbətləşdim. Futbolçulardan isə yalnız Namiq Yusifovla münasibətim qalır.
- O vaxt "Qarabağ"dan tez getməyinizə nə səbəb oldu?
- "Vorskla"dan təklif gəldi. Onlar çıxışımı diqqətlə izləyirdilər. Onların bu təklifini qəbul etməli oldum.
