Rauf Əliyev: Berti Foqtsun gedişi millimizin xeyrinə olacaq

Futbol üzrə Azərbaycan yığmasının və "Xəzər Lənkəran"ın hücumçusu Rauf Əliyevin azerispot.az saytına müsahibəsi

- "Bakı" üzərində 4:0 hesablı qələbəni necə şərh edə bilərsiz?
- İlk qola qədər çox çətinlik çəkdik. Amma hesab açılandan sonra özünəinam artdı. Nəticədə yaxşı nəticə qazana bildik.

- Penalti ədalətli qərar idi?
- Bu barədə danışmaq istəmirəm. Hakimin qərarı müzakirə olunmur.

- İkinci penalti zamanı Qalin İvanov və Alfred Sanko ilə nəyi bölüşə bilmirdiz?
- Orada sadəcə, anlaşılmazlıq yarandı. Hətta baş məşqçi də mənim vurmağımı istəyirdi. Digər oyunçular isə başqasına işarə etdiyini düşünürdü.

- Keçmiş komandanıza qarşı oyunda həyəcan var idi?
- Xeyr, heç bir xüsusi hiss yox idi. Adi oyun oldu.

- Keçmiş komanda yoldaşlarınızla söhbətləşə bildiz?
- Əlbəttə, orada mənə yaxın uşaqlar oynayır.

- XL bu qələbə sayəsində 5-ci pilləyə yüksəldi...
- Bu, hələ son hədd deyil. Biz daha yüksək yerləri tutmaq üçün mübarizə aparacağıq.

- Qarşıda sizi daha bir keçmiş klubunuzla - "Qarabağ"la oyun gözləyir...
- Çətin oyun olacaq. Özü də səfərdə oynayacağıq.

- Berti Foqtsun istefasını necə qarşıladız?
- Hər şeyi zaman göstərəcək. İstənilən halda belə bir dəyişiklik yığmamızın xeyrinə olmalıdı.

- Bilirsiz ki, Foqts yığmamızın üzvlərini qeyri-peşəkarlıqda günahlandırıb?
- Buna cavab verməyəcəm. Qoy nə danışır, danışsın.

- Mahmud Qurbanovdan nə gözləyirsiz?
- O, bu postda müvəqqətidi. Amma şadam ki, bizi Norveçlə oyuna məhz o çağıracaq. Çalışacağıq ki, azarkeşləri sevindirək.

- Yığmada yerli, yoxsa əcnəbi məşqçi görmək istərdiz?
- Yerli.

- Mahmud Qurbanovu, ya Şahin Diniyevi?
- Bu barədə nəsə deyə bilmərəm.