Toğrul Erat: Berti Foqts qalsaydı, Norveçə qalib gələrdik

Futbol üzrə Azərbaycan yığmasının hücumçusu Toğrul Eratın azerisport.az saytına müsahibəsi

- Berti Foqtsun istefası barədə nə deyə bilərsiz?
- AFFA rəsmiləri nəyi necə etmək lazım olduğunu daha yaxşı bilirlər. Foqtsun bu qərarına hörmətlə yanaşmağımız lazımdı.

- Onun istefasına üzüldüz?
- Mənə elə gəlir ki, o qalsaydı, biz Norveçə qalib gələ bilərdik. Amma olan olub, nə edə bilərik?

- Sizi yığmamıza məhz Foqts dəvət etmişdi...
- Elədi. Amma düşünmürəm ki, onun gedişi ilə yığmanın qapıları mənim üzümə bağlanacaq. Mən "Fortuna"da sabit çıxış etsəm, yenə milliyə dəvət ala bilərəm.

- Mahmud Qurbanovla tanışsız?
- Əlbəttə. Amma baş məşqçi vəzifəsinin müvəqqəti olaraq ona tapşırılmasından xəbərsiz idim. Ona uğurlar arzulayıram. İstənilən halda, Norveçlə oyunda qələbə qazanmağa çalışmalıyıq.

- Siz bunu real sayırsız?
- Məncə, realdı. Bütün futbolçularımız öz bacarıqlarını nümayiş etdirə bilsə, biz onları məğlub edə bilərik.

- Foqtsun istefası Almaniyada geniş müzakirə olunur?
- Əlbəttə, hamı onun istefasından xəbərdardı. Mənə də bu barədə suallar verirlər. Amma mən bu barədə xüsusi informasiyaya malik olmadığıma görə cavab vermək istəmirəm.

- Sizcə, onun gedişi millimizə faydalı olacaq?
- Foqtsun dövründə həm yaxşı oyunlarımız olub, həm də pis. Ötən illərlə müqayisədə inkişaf hiss olunurdu. Biz Rusiyaya uduzmadıq, Şimali İrlandiyaya qalib gəldik. Son oyunlarda uduzsaq da, həmin uğurları da unutmaq olmaz.