Muarem Muarem: Dneprlə oyunlarda 4 xal qazanmaq əsas hədəfimizdi

"Qarabağ"ın yarımmüdafiəçisi Muarem Muaremin azerisport.az saytına müsahibəsi

- "Qəbələ"yə qalib gəlsəz də, çətinlik çəkdiyiniz hiss olunurdu...
- Təbii ki, ağır oyun oldu. Bunun da öz səbəbləri var. Məsələn, xeyli müddət idi ki, bir yerdə məşq etmirdik. Əksər oyunçular ölkəsinin yığmasına dəvət olunmuşdu. Bizdə adətən yığmaların oyunlarından sonra belə çətinliklər olur. Əvvəllər hətta millinin oyunlarından sonra uduzurduq. Şadam ki, bu dəfə elə olmadı. Üç xal qazanmaq bizim üçün vacib idi.

- "Qarabağ" oyunun gedişində etdiyi dəyişikliklər sayəsində daha yaxşı oynadı...
- Elədi. Ümumiyyətlə, buna həmişə hazır olmaq lazımdı. Baş məşqçi bizi hansı mövqedə oynadırsa, bunu ən yaxşı şəkildə həyata keçirməliyik.

- Demək olar ki, komandanız Ukrayna "Dnepr"i ilə Avroliqa oyununa görə bu oyunda tam gücünü göstərmədi?
- Xeyr. Biz hər oyuna ayrıca hazırlaşırıq. Hazırda əsas diqqətimiz məhz "Dnepr"lə oyuna yönəlib. Amma bundan öncə ancaq "Qəbələ" ilə görüşü düşünürdük. Yəni hər şeyin öz vaxtı var. Yığmadan qayıdan oyunçularımızda yorğunluq da var idi. Belə bir vəziyyətdə "Qəbələ"yə qalib gəlməyimiz 3 xalı daha dəyərli edir.

- Ukrayna klubu ilə oyundan nə gözləyirsiz?
- Biz qrupdakı istənilən rəqibi məğlub edə bilərik. Amma "Dnepr"lə də səfərdə oynayacağıq və istəyimizə çatmaq çətin olacaq. Bu komanda ilə oyun bizim qrupdan çıxmaq yolunda bir çox suallara aydınlıq gətirəcək. Əsas hədəfimiz Kiyevdə uduzmamaqdı. Oradan yaxşı nəticə ilə qayıtmaq istəyirik.

- Deməli, siz "Dnepr"lə qarşıdakı iki oyundan 4 xalla ayrılmağı hədəfləmisiz?
- Altı xal qazanmağımız daha yaxşı olardı. Amma dörd xalı da pis nəticə saymaq olmaz. Əsas səfər oyununda uduzmamaqdı.