Dodo: Hakim bizə oynamağa imkan vermədi
"Qəbələ"nin yarımmüdafiəçisi Dodonun azerisport.az saytına müsahibəsi
- "Qarabağ"a məğlubiyyətlə bağlı nə deyə bilərsiz?
- İlk növbədə onu qeyd edim ki, "Qəbələ" bu görüşdə pis oynamadı. Biz məğlubiyyətə yox, daha artığına layiq idik. İlk hissədə hesabı açmağa borcluyduq.
- Amma bunu rəqib etdi...
- Bizdə nəsə çatışmadı. Bəzi məqamlar daha yaxşı oynamağımıza mane oldu.
- Siz hakimlikdən narazı qaldığınızı demək istəyirsiz?
- Hə. "Qarabağ"ın qələbəsinə kölgə salmaq istəmirəm. Amma hakim bizə qarşı çox çalışdı. Demirəm Rəhim Həsənov rəqibin qələbə qazanmasını istəyirdi. Sadəcə, o, bizə oynamağa imkan vermədi.
- Sizə elə gəlmir ki, müdafiə xəttiniz bu oyunda çox kobud səhvlər buraxdı?
- Hamı səhv edir. Mən ancaq müdafiə xəttini qınamaq fikrindən uzağam. Səhvi bütün komanda buraxdı.
- İstənilən halda "Qəbələ" yenə qələbə qazana bilmədi...
- Son zamanlar bizim qətiyyən bəxtimiz gətirmir. Yaxşı kollektivimiz, baş məşqçimiz var. Amma bu, futboldu, bir gün yaxşı oynayırsan, o birində pis. Fikrimcə, yaxşı komanda olduğumuza görə qələbə qazanmağa borcluyuq.
- Siz zədə səbəbindən bir neçə oyunu buraxdız, amma "Qarabağ"la görüşdə meydanda idiz...
- Artıq qaydasındayam. Amma 100 faiz yox. Növbəti oyunda tam hazır olacağam və "Sumqayıt"la görüşdə komandama daha çox kömək edəcəm.
