Reynaldo: Ümid edirəm ki, Qurban Qurbanov Qarabağda qalacaq

"Qarabağ"ın hücumçusu Reynaldonun Topaz Premyer Liqasının 8-ci turunda qarşılaşdıqları “Qəbələ” ilə oyundan (2:0) sonra azerisport.az saytına müsahibəsi

- "Qəbələ"ni məğlub etdiz. Bu oyunu necə şərh edərdiz?
- Əlimizə düşən imkanları dəyərləndirib, 2 cavabsız qol vurduq. Rəqibin də şansı oldu. Xüsusən, ilk hissədə yaxşı hücumlar qurdular. Amma yaxşı ki, Vüqar Nadirov fasiləyə dəqiqələr qalmış qol vurdu. İkinci hissədə də daha bir qol vurub, qalib gəldik.
 
- Son oyunlardan sonra belə fikir yaranıb ki, Reynaldo əlverişli qol imkanlarında xəsislik edib, komanda yoldaşlarına ötürmə vermir. Bununla razılaşırsız?
- Mən komandamızın qələbəsi üçün hər şeyi edirəm. Hücumda tək oynayıram. Ona görə də bəzən ötürmə vermək üçün imkanım olmur.
 
- Artıq neçə oyundu ki, əlverişli qol vəziyyətlərindən yararlana bilmirsiz. Bunun səbəbi nədi?
- Əlimə düşən imkanlardan istifadə etmək istəyirəm. Topu vururam, qapıya daxil olmur. Başqa nə edə bilərəm ki? Məyus olmağa dəyməz.
 
- Komandanızın yeni transferi, isveçrəli hücumçu İnnosent Emeqaranın çıxışı haqqında nə deyə bilərsiz?
- Yaxşı futbolçudu. İnanıram ki, “Qarabağ”a çox kömək edəcək.
 
- Zədəli olan Danilo Dias və Çumbinyonun yoxluğu sizə qarşıdakı oyunlarda nə kimi çətinliklər yarada bilər?
- Danilo Dias tezliklə meydana dönəcək. Çumbinyo isə uzun müddət olmayacaq. O, bizim üçün çox vacib futbolçudu.
 
- Azərbaycan milli komandasının baş məşqçisi Berti Foqts istefa verdi. Bu barədə nə deyə bilərsiz?
- Mən millinin futbolçusu deyiləm. “Qarabağ”da oynayıram və yalnız bu komanda haqqında suallara cavab verə bilərəm.
 
- Qurban Qurbanov Azərbaycan millisinin baş məşqçi postuna ən real namizəddi. Onun yığmaya getməsini istəyərdizmi?
- Ümid edirəm ki, o, “Qarabağ”da qalacaq. Çünki  Qurban Qurbanov bu komandaya çox lazımdı.