Vanderson Skarduelli: XL qış fasiləsinə ilk üçlükdə yollanmalıdı

"Xəzər Lənkəran"ın müdafiəçisi Vanderson Skarduellinin azerisport.az saytına müsahibəsi

- "Bakı" ilə oyundan nə gözləyirsiz?
- Bilirik ki, bizim üçün vacib oyundu. Liderlər bizdən hər tur daha da aralanır. Bu ənənəyə son qoymaq lazımdı. Mümkün qələbə bizim turnir cədvəlindəki vəziyyətimizi yaxşılaşdıra bilər.

- Rəqib güclü heyətə malik olmasa da, son iki oyunda qələbə qazanıb...
- "Bakı"da baş verənlərdən xəbərim var. Onlar heç də yaxşı dövrlərini yaşamırlar. Amma biz özümüz də elə vəziyyətdə deyilik ki, hansısa rəqibi qiymətləndirməyək. XL hazırda 7-ci pillədə qərarlaşıb və qələbə qazanmağa borcludu.

- "Xəzər Lənkəran"ın sonadək belə qeyri-sabit çıxış edəcəyini gözləmək olar?
- Xeyr. Komandamızın kifayət qədər gücü və potensialı var ki, vəziyyəti yaxşılaşdırsın. Biz sonadək turnir cədvəlinin axırıncı pillələrində qərarlaşa bilmərik.

- Bəs "Neftçi", "Qarabağ", "İnter" kimi klublarla baş-başa mübarizə aparmağa gücünüz yetəcək?
- Əlbəttə, indi layiq olduğumuz yerdə deyilik. Amma əminliklə deyə bilərəm ki, bizim bu komandalarla mübarizə aparmaq üçün kifayət qədər potensialımız və gücümüz var.

- Artıq iki ildi cənub klubundasız. Özünüzü komandanın pis çıxışında günahkar hesab edirsiz?
- Bəli, mən də günahkaram. Futbol komanda oyunudu və qələbə qazananda payım olduğu qədər, məğlubiyyətdə də günahım var.

- İki ay sonra qış fasiləsi başlayacaq. Sizcə, komandanız fasiləyə neçənci pillədə yollana bilər?
- İlk üçlükdə olmalıyıq.