Kankava: Qarabağ güclü olsa da, Kiyevdə bizi ancaq qələbə qane edəcək

Ukraynanın "Dnepr" klubunun yarımmüdafiəçisi Jaba Kankava Avropa Liqasının qrup mərhələsi çərçivəsində Azərbaycan çempionu "Qarabağ"a qarşı keçirəcəkləri oyun öncəsi fikirlərini açıqlayıb. Azerisport.az saytına açıqlamasında o, bunları söyləyib:

"Hamımıza maraqlı bir qrup qismət olub. Hələ ki, həm bizim, həm də "Qarabağ"ın qrupdakı vəziyyəti yaxşı deyil. Amma hər iki komandanın pley-offa yüksəlmək şansı qalmaqdadı".

Kankava Azərbaycan çempionuna hörmətlə yanaşdıqlarını söyləyib: "Onların oyunlarına baxmışam. Həm "Sent-Etyen", həm də "İnter"lə görüşü izləmişəm. "Qarabağ"ın hər iki rəqibinə qol vurmaq şansları oldu. Bu komandada daha çox müdafiə və hücum xəttini xüsusi qeyd edərdim".

"Qarşıda "Qarabağ"la iki oyun var. Öncə Kiyevdə oynayacağıq. Rəqibin gücünə baxmayaraq, bizi ancaq qane edəcək".

"Bakıdakı oyuna gəlincə, hələ ona vaxt var. İstənilən halda, bizə hər iki görüşdə çətin olacaq".

Qeyd edək ki, ilk iki oyundan sonra bu komandalar hərəyə 1 xal toplaya bilib. "Qarabağ" oktyabrın 22-də Kiyevdə "Dnepr"in qonağı olacaq.