Kazbek Tuayev: Milliyə Qurban Qurbanov başçılıq edə bilər

AFFA İcraiyyə Komitəsinin üzvü Kazbek Tuayevin azerisport.az saytına müsahibəsi

- Yığmamızın Xorvatiyaya məğlubiyyətini necə qarşıladız?
- Komandamız çox pis oynadı. Mən belə olacağını hiss edirdim İtalyanlar indi elə vəziyyətdə deyillər ki, hamının gözlədiyi futbolu sərgiləsinlər. Amma xorvatlar onlardan fərqli tam hazır idilər. Çox təhlükəli komandadı.

- Xorvatlar istəsəydi, daha çox qol vura bilərdilər...
- Bəli, təəssüf ki, hesab daha faciəvi ola bilərdi. Yaxşı ki, son yarım saatda özlərinə çox əziyyət vermək istəmədilər. İstənilən halda yığmanı asıb-kəsmək istəmədim. Belə hallar olur. Son dövrlər Berti Foqtsu da başa düşə bilmirəm. İtalyanlarla müdafiə futbolu oynayır, 2-3 gün sonra xorvatlara qarşı hücum futbolunu seçir. Bu, onun taktiki səhvi idi.

- Düşünmürsüz ki, belə oyundan sonra bəzi futbolçular yığma karyerasını başa vurmalıdı?
- Məncə, hətta belə biabırçı məğlubiyyətə rəğmən, yığma faciəvi təsir bağışlamadı. Amma istənilən halda alman mütəxəssis Vaqif Cavadovla Mahir Şükürovu yığmaya cəlb etməli idi. Bu da onun bir səhvidi. Belə oyunlarda təcrübəli futbolçulara ehtiyac vardı.

- Yığmamızdan Norveçlə oyunda nə gözləyə bilərik?
- Onların oyununa baxmışam, pis komanda deyil. Amma skandinaviyalılara qarşı oynamaq, hətta qalib gəlmək də olar. Əks halda tsikli boşa vermiş olacağıq.

- Xorvatlarla oyundan sonra Foqts yığmadan gedə biləcəyinə işarə vurub...
- Belə məğlubiyyətdən sonra onu başa düşmək olar. Yəqin ki, o, özü də bütün bunlardan bezib. Biz çoxdan idi belə böyük hesabla uduzmurduq. Foqts özü də rəsmi oyunlarda belə məğlubiyyətlə üzləşməmişdi.

- Sizə elə gəlmir ki, o, artıq yığmamızdan yaxa qurtarmağa çalışır?
- Yəqin ki, bu məsələ AFFA İK-nın növbəti toplantısında müzakirə olunacaq. Foqtsun gedişi ilə Azərbaycanda futbol bitməyəcək. Onu əvəzləmək üçün kifayət qədər variant var. Elə Qurban Qurbanovun özü Foqtsu layiqincə əvəzləyə bilər. Başqa əcnəbiyə də müraciət etmək olar.