Mandjukiç: Azərbaycana böyük hesabla qalib gəlmək hədəfimiz yox idi

Futbol üzrə Xorvatiya yığmasının hücumçusu Mario Mandjukiç AÇ-2016-nın seçmə mərhələsi çərçivəsində Azərbaycana qarşı oyundan sonra jurnalistlərin suallarını cavablandırıb:

- Azərbaycan yığması sizi nə iləsə təəccübləndirə bildi?
- Xeyr, heç nə ilə. Biz bu komandanın möhkəm olduğunu bilirdik. Amma başa düşürdük ki, ilk dəqiqələrdə qol vurmalıyıq. Bunu nə qədər tez etsəydik, işimiz bir o qədər asan olacaqdı.

- Siz qol vura bilmədiz. Niyə?
- Mənə qarşı çox yaxın oynayırdılar, başımı çevirməyə imkan vermirdilər. Amma mən komanda yoldaşlarım üçün boşluqlar yaratmağa çalışırdım. Fikrimcə, bu, məndə alınırdı.

- Bu, Xorvatiya yığmasının ən yaxşı oyunu idi?
- Şübhəsiz ki, hə. Bilirdik ki, azarkeşlər bizdən yaxşı futbol gözləyirlər, biz də bunu göstərdik. Çox şadam ki, hər şey uğurlu nəticələndi.

- Komanda qarşısında mümkün qədər çox qol vumraq hədəfi qoyulmuşdu?
- Xeyr. Böyük hesabla qələbə qazanmaq hədəfimiz yox idi. Sadəcə, ələ düşən şanslardan yararlanmağa çalışırdıq.

- Artıq Xorvatiyanı qrupun favoriti saymaq olar?
- Hələ ki, liderik. Sonra necə olacağını zaman göstərəcək.