Rahid Əmirquliyev: Mən Xorvatiyaya yaxşı əhval-ruhiyyədə gəlmişəm

Futbol üzrə Azərbaycan yığmasının yarımmüdafiəçisi Rahid Əmirquliyevin azerisport.az saytına müsahibəsi

- Xorvatiya ilə oyundan nə gözləyirsiz?
- Bu qarşılaşma İtaliya ilə görüşdən daha çətin olacaq. Çünki Palermoda xeyli güc sərf etdik. Amma biz istənilən halda yaxşı nəticə qazanmağa çalışacağıq.

- İtaliya ilə oyun barədə nə deyə bilərsiz?
- Biz yaxşı futbol sərgiləməyi bacardıq, sonadək mübarizə apardıq. Fikrimcə, rəqibi hirsləndirməyi də bacardıq. Amma təəssüf ki, xal qazanmağı bacarmadıq.

- Heç-heçəni qorumağa nə mane oldu?
- Artıq səhvlərimizi analiz etmişik, niyə uduzduğumuzun səbəbini özümüz bilirik. Xorvatiya ilə görüşdə həmin səhvlərin təkrarlanmamasına çalışacağıq.

- Bu məğlubiyyət kefinizi pozmadı?
- Düzünü deyim ki, mən Xorvatiyaya yaxşı əhval-ruhiyyədə gəlmişəm.

- Palermoda Zazanı "bağlamaq" tapşırığı almışdız?
- Xeyr. Sadəcə, biz bilirdik ki, İtaliya iki hücumçu ilə oynayacaq. Ona görə də müdafiəyə kömək edirdim. Həm Zazaya, həm də İmmobileyə qarşı oynamalı oldum.

- Hesab bərabərləşəndə 1 xal qazanacağınıza inanırdız?
- Bəli. Çünki ondan sonra topa sahib olmada da inamlı təsir bağışlayırdıq. Amma kiçik diqqətsizlik bizi 1 xaldan məhrum etdi.