Şpiçiç: Mən hardan bilim ki, azərbaycanlı futbolçular nə qədər mükafat əldə edəcək?

Bakı "İnter"inin xorvatiyalı müdafiəçisi Matiya Şpiçiç AÇ-2016-nın seçmə mərhələsi çərçivəsində keçiriləcək Xorvatiya - Azərbaycan matçı öncəsi millimizin üzvlərinin qələbə qazanacağı halda 100 000 avro qazanacağı barədə yerli mətbuata dediyi açıqlamanı şərh edib. Azerisport.az saytına açıqlamasında o, bu barədə söylədiklərini təkzib edib:

"Mən Xorvatiya mətbuatına müsahibə vermişəm. Amma mənim sözlərimi yanlış başa düşüblər. Mən azərbaycanlı futbolçuların qələbə qazanacağı halda böyük məbləğdə mükafat əldə edəcəyini demişəm. Amma konkret məbləğ açıqlamamışam. Artıq həmin qəzetlə əlaqə saxlayıb elə bir söz demədiyimi diqqətə çatdırmışam. Ümumiyyətlə, mən hardan bilim ki, azərbaycanlı futbolçular nə qədər mükafat qazanacaqlar"?