Foqts: Xorvatiyaya qarşı İtaliya ilə matçdakı kimi oynayacağıq

Futbol üzrə Azərbaycan yığmasının baş məşqçisi Berti Foqts AÇ-2016-nın seçmə mərhələsi çərçivəsində Xorvatiyaya qarşı oyun öncəsi fikirlərini açıqlayıb. Azerisport.az xəbər verir ki, o, Osiyekdə keçirilmiş mətbuat konfransında öncə bunları söyləyib:

- Xorvatiya dünya çempionatında çıxış etmiş, Meksika və Braziliya ilə mübarizə aparmış komandadı. Bu matçları stadiondan canlı izləmişdim. Komandama çətin olacaq. Biz hələ belə tempə alışmamışıq. İtaliya ilə oyundan sonra bərpa prosesi keçirik. Biz hələ hücum futbolu sərgiləyəcək səviyyədə deyilik.

- Sizcə, İtaliya ilə oyunda xal qazanmağımıza nə mane oldu?
- Biz standart vəziyyətlərdən iki qol buraxdıq. Halbuki, buna imkan verməməliydik. Top-komandalar belə səhvləri bağışlamırlar. Bolqarıstanla qarşılaşmada da hesabı bərabərləşdirdik, son dəqiqələrdə qapımızda gördüyümüz ikinci qol nəticəsində uduzduq. Fikrimcə, hər iki oyunda hesab 1:1 olarkən daha diqqətli oynamağımız lazım idi.

- Bəs bu son dəqiqələrdəki diqqətsizliyi aradan qaldırmaq üçün nə etmək lazımdı, buna nə qədər vaxt lazımdı?
- Mən 7 ildi burda çalışıram. Amma bu işlə klublarda da məşğul olmaq lazımdı. Futbolçular fiziki cəhətdən 90 dəqiqə oynamağa hazır deyillər. Oyunçular daha çox klublarında məşq edirlər, amma bunun üzərində çox çalışmırlar.

- Kamran Ağayev Osiyekə qələbə üçün gəldiklərini dedi. Sizin buna münasibətiniz necədi?
- Ağayev yaxşı oyunçudu. Amma mən yuxu yox, reallığı görmək istəyirəm. İtaliya ilə oyunda yaxşı pressinq tətbiq etsək də, yetərli deyildi. İstənilən halda sabah da Palermodakı kimi oynamağa çalışacağıq.