Elnur Allahverdiyev: AFFA prezidenti bizə dedi ki, ilk hissədə sanki çəkinirdik

Futbol üzrə Azərbaycan yığmasının müdafiəçisi Elnur Allahverdiyevin azerisport.az saytına müsahibəsi

- İtaliyaya məğlubiyyəti (1:2) necə şərh edə bilərsiz?
- Məğlubiyyətə baxmayaraq, biz yüz faiz gücümüzü meydanda qoyduq, çalışdıq ki, uduzmayaq. Bu oyuna yaxşı hazırlaşmışdıq. Amma alınmadı.

- Berti Foqts paltardəyişmə otağında sizə nə dedi?
- Dedi ki, artıq Xorvatiya ilə oyunu düşünməyimiz lazımdı, növbəti oyuna hazırlaşmalıyıq.

- Bəs AFFA prezidenti Rövnəq Abdullayev?
- O, qeyd etdi ki, ilk hissədə sanki çəkinirdik. Təsadüfi hallarda hücuma çıxmağımızı vurğuladı. İkinci hissədə daha inamlı oynadıq.

- Onunla razısız?
- Prinsipcə, hə. Biz dünyanın ən güclü komandalarından birinə qarşı oynayırdıq. Ona görə də bəzi futbolçularımızda həyəcanın olması təəccübləndirici deyil.

- Məğlubiyyətə görə üzülürsüz?
- Təbii ki, üzücü məğlubiyyətdi. Biz Palermodan xalla ayrıla bilərdik. Dünyanın ən güclü komandalarından birinə qarşı oynasaq da, qol vurmağı bacardıq. Xal qazanmağa çox yaxın idik. Hiss edirdik ki, artıq heç-heçə etmək olar. Amma sonda buraxdığımız qol hər şeyi korladı.

- Xorvatlarla oyundan nə gözləyirsiz?
- Fikrimcə, onlarla da oyun çətin olacaq. Üstəlik, bizi hələ uzun yolçuluq da gözləyir. Amma başqa çıxış yolumuz yoxdu. Osiekdə sonadək vuruşmalıyıq.