Simurq Dinamoya qalib gəldi
"Simurq" Topaz Premyer Liqasının növbəti turuna hazırlıqları davam etdirir. Azerisport.az xəbər verir ki, oktyabrın 6-da Zaqatalada bir araya gələn "sarı-qaralar" gündə iki dəfə olmaqla məşqə çıxır.
Yalnız millinin düşərgəsində olan İlkin Qırtımov, Vadim Abdullayev və Vüqar Mustafayev hazırlıqlarda iştirak etmir. Uzun müddətdi zədə səbəbindən komandadan ayrı qalan Murad Səttarlı isə artıq tam sağalaraq məşqlərə başlayıb.
Milli komandanın seçmə qrup mərhələsindəki oyunları ilə əlaqədar Topaz Premyer Liqasında yaranmış fasilədən istifadə edən Zaqatala təmsilçisi iki günlük Gürcüstana yollanıb. Georgi Çixradzenin yetirmələri oktyabrın 11-də qonşu ölkənin paytaxtında Tiflis "Dinamo"su ilə yoxlama görüşü keçirib. Qarşılaşma "Simurq"un minimal hesablı qələbəsi ilə başa çatıb - 1:0. Yeganə qolu Oruc Balaşlı rəqib qapısından keçirib.
Bundan sonra Zaqatalaya qayıtmağı planlaşdıran "Simurq" bir günlük istirahətdən sonra yenidən çalışmaları davam etdirəcək.
Qeyd edək ki, Topaz Premyer Liqasının 8-ci turu çərçivəsində "Simurq"un rəqibi turnir cədvəlinin lideri "İnter" olacaq.
