Kramarenko: Foqtsa yox, milliyə azarkeşlik edəcəm
Futbol üzrə Azərbaycan yığmasının sabiq qapıçısı Dmitri Kramarenkonun azerisport.az saytına müsahibəsi
- Kamran Ağayevi yığmaya yola salarkən nəsə dediz?
- Xüsusi bir söhbətimiz olmadı. Onsuz da İtaliya və Xorvatiya ilə oyunlarda onu nə gözlədiyini yaxşı bilir.
- O, ilk dəfə italyanlara qarşı oynayacaq. Siz isə artıq oynamısız...
- Kimə qarşı oynamağın fərqi yoxdu. Kamranın işi istənilən halda çox olacaq. Ağayev ilk dəfə deyil ki, yığmaya dəvət alır. Mən ona həmişə özündən çıxmamağı məsləhət görürəm. Qapıçı ayrıca bir "dövlət"di. Əgər komanda yaxşı oynayırsa, sən diqqətli olmalısan. Pis oynayanda isə qolkiperin ikiqat diqqətli olması lazım gəlir.
- İtaliya ilə oyundan hansı xatirələriniz qalıb?
- Belə komandalara qarşı oyundan həmişə xoş xatirələr qalr. Düzdü, hesab 0:2 olanda Kristian Vyeri məni zədələdi və Cahangir Həsənzadə ilə əvəzləndim. Bakıdakı oyunda isə bir qolu özümüz vurduq, digərini də Del Pyero cərimə zərbəsindən vurdu.
- Sizcə, yığmamız yenə 0:4 hesabıyla uduza bilər?
- Çox istərdim ki, millimiz bu dəfə layiqli oyun sərgiləsin. Ümid edirəm ki, komandamız "Qarabağ"ın Avropa Liqasında Fransa "Sent-Etyen"inə, İtaliya "İnter"inə qarşı oynadığı kimi mübarizə aparacaq. Bu komanda məni sevindirir.
- Məğlub olmamağımız mümkündü?
- Futbolda hər şey ola bilər.
- Bəs real götürsək?
- Real götürsək, "Neftçi" vaxtilə Milan "İnter"i ilə səfərdə sülh bağlayıb. Bakılılar onda layiqli çıxış etmişdi. Halbuki, hamı komandamızın məğlub olacağını gözləyirdi. "Qarabağ" da bu komanda ilə sülh bağlaya bilərdi. Sadəcə, layiq olmadığımız yenilgi ilə üzləşdik.
- Xorvatiyadan da eyni qaydada çəkinməliyik?
- Hər iki komanda bizdən xeyli güclüdü. Xorvatların da top-klublarda oynayan 6-7 futbolçusu var. Komandamız bu rəqibə qarşı xüsusi motivasiya ilə oynayacaq. Yığmamıza azarkeşlik edəcəm, amma Foqtsa yox. (gülür)
- Bu niyə?
- Mən onu bir insan kimi tanımıram. Amma mətbuata açıqlamaları, işinə münasibəti ona simpatiya bəsləməyimizə imkan vermir.
