Foqts: 23 yaşlı futbolçu İtaliya qarşısında qorxu hissi ilə çıxacaqsa...
Futbol üzrə Azərbaycan yığmasının baş məşqçisi Berti Foqts AÇ-2016-nın seçmə mərhələsi çərçivəsində İtaliyaya qarşı keçiriləcək oyun öncəsi fikirlərini açıqlayıb. Azerisport.az xəbər verir ki, o, bu gün Palermoda baş tutan mətbuat konfransında öncə bunları söyləyib:
- İtaliya gözəl ölkədi, gözəl havası, dənizi var. İtaliya yığmasının Antonio Kontenin rəhbərliyi altında keçirilmiş oyunlarına baxanda bu komandanın səviyyəsinə bir daha əmin oluram. İtaliya futbolunun yaxın dostu kimi, bu ölkə yığmasının son dünya çempionatında qrup mərhələsini adlaya bilməməsinə çox təəssüfləndim. Amma futbolda belə şeylər olur.
- Siz İtaliyaya qarşı həm futbolçu, həm məşqçi kimi mübarizə aparmısız. İtaliya futbolu hansı özəllikləri ilə seçilir?
- Texnikası və qələbə qazanmaq istəyi ilə, taktiki intizamına görə. İtaliya futbolu bu kimi özəlliklərinə görə həmişə fərqlənib.
- Mahir Şükürovla Vaqif Cavadovu yığmaya niyə dəvət etməmisiz?
- Mənə elə gəlir ki, oyun ərəfəsində belə suallar vermək düzgün deyil. Bu suala mütləq cavab verəcəm. Onların fiziki hazırlığı xoşuma gəlmir. Türkiyənin ikinci liqasında çıxış etsələr də, son toplanışda onların daha yaxşı hazırlaşmalarına ehtiyac olduğunu gördüm. Bilirsiz ki, AÇ-2020-nin bəzi oyunları Bakıda keçiriləcək. Biz artıq indidən gənclərə yol açmalı, onlara oynamaq imkanı yaratmalıyıq.
- Frankfurt toplanışı yığmamıza nə qazandırdı?
- Çox şadam ki, Frankfurtda belə bir toplanış keçirə bildik. Ondan öncə "Qarabağ"ın İtaliya "İnter"i ilə oyununa tamaşa etmək imkanım da oldu. Onu deyim ki, hazırda bütün futbolçular formada deyil. Səbəbini bilmirəm. Həmişə demişəm ki, çempionatda uzun fasilələr yaranmamalıdı. İtaliya və Xorvatiya ilə oyunlarda bizə çox çətin olacaq.
- Komandada atmosfer necədi?
- Hamımız kişiyik, 18 yaşdan sonra hər bir şəxs özünü kişi hesab edir. Əgər 23 yaşlı futbolçu İtaliya qarşısına qorxa-qorxa çıxacaqsa, o, əbəs yerə futbolu seçib. Mənim boyum 167 sm-di, gəncliyimdə Matsoleyə qarşı mübarizə aparmışam. Sizcə, mən ondan qorxurdum?
- İmmobile - Zaza hücum cütü barədə nə deyə bilərsiz?
- Antonio Konte çox istedadlı mütəxəssisdi. O, İtaliya futboluna daha çox xeyir gətirə bilər. Onun rəhbərliyi altında yığma daha yaxşı oynamağa başlayıb. Zaza və İmmobileyə gəlincə, texnikalı futbolçulardı, Balotelliyə oxşamırlar. İmmobileni Almaniya çempionatının oyunlarında tez-tez görürəm. Ona uyğunlaşmaq üçün vaxt lazımdı.
- Qarşıdakı iki oyundan neçə xalla ayrılmağı düşünürsüz?
- Biz meydana çıxıb 90 dəqiqə mübarizə aparmalıyıq. Futbolumuzun inkişaf etdiyini göstərməliyik. İtaliya və Xorvatiya kimi rəqiblərə qarşı oynaya bilərik. Amma iddia edə bilmərik ki, qarşıdakı iki oyunda 6 xal qazanmaq üçün mübarizə aparacağıq.
