Mitreski: Qarabağın İnter ilə heç-heçəsi əla, qələbəsi fantastik nəticə olacaq

"Neftçi"nin sabiq müdafiəçisi İqor Mitreskinin azerisport.az saytına müsahibəsi

- "Qarabağ"ın Avroliqadakı çıxışını izləyirsiz?
- Əlbəttə. Onlara azarkeşlik edirəm. Çox istərdim ki, daha bir Azərbaycan klubu "Cüzeppe Meatsa"da yaxşı çıxış etsin. Bu, çox yaxşı bir ənənə olardı.

- Vaxtilə "Neftçi"nin heyətində "İnter"ə qarşı oynamış bir futbolçu kimi ağdamlılara nəyi məsləhət görərdiz?
- İlk növbədə maksimum güclə oynamağı. Əks halda milanlılarla görüşdə heç nə alınmayacaq. Sürətdə rəqibdən geri qalmamağa çalışmaq, müdafiədə sayıq oynamaq lazımdı. İrəli atılmağı da məsləhət görmürəm. Amma əminəm ki, Qurban Qurbanov mənim bu sözlərim olmadan da nəyi necə etmək lazım olduğunu yaxşı bilir. Onun bu sahədə kifayət qədər təcrübəsi var.

- "Qarabağ" Fransa "Sent-Etyen"i ilə oyunda yaxşı çıxış etdi, amma qələbə qazana bilmədi...
- "Sent-Etyen"lə "İnter" arasında müəyyən səviyyə fərqi var. Həm də "Sent-Etyen"lə oyun Bakıda idi, indi isə matç İtaliyada baş tutacaq. Bunlar tamamilə fərqli məqamlardı.

- "İnter"in bu oyuna tam heyətlə çıxmamasını gözləmək olar?
- Dəqiq necə olacağını deyə bilmərəm. Amma son turda "Kalyari"yə uduzduğuna görə bu komanda vəziyyəti düzəltməyə çalışacq. Onların 25 çox güclü futbolçusu var. "İnter"dən zəif heyət gözləməyə dəyməz. Kiminlə də oynasalar, "Qarabağ"a çətin olacaq.

- "Qarabağ" nəyə ümid edə bilər?
- Heç-heçə əla, qələbə fantastik nəticə olacaq. "Neftçi" iki il öncə "İnter"ə qarşı pis oynamadı və iki qol vurdu. Hər şey də ədalətli oldu. Ağdamlılara da uğurlu oyun arzulayıram.

- Əfsanəvi stadionda oynamaq "Qarabağ"ın gənclərinə çətin olmayacaq?
- Asan olmayacaq. Amma oyundan həzz almağa çalışmaq lazımdı. Hər gün belə stadionda oyuna çıxmaq qismət olmur.