"Azərbaycanda istedadlı futbolçuların olduğunu bütün dünyaya göstərmək istəyirəm"
"Bakı"nın yarımmüdafiəçisi Mahir Mədətovun azerisport.az saytına müsahibəsi
- "Araz Naxçıvan" üzərində qazandığınız qələbə ilə bağlı nə deyə bilərsiz?
- Bilirdik ki, çətin olacaq. Hər iki komandanın 3 xala çox ehtiyacı vardı. İlk dəqiqələrdə rəqibdən daha yaxşı oynadıq və hesabı açdıq. Daha bir neçə qol vura bilərdik. Amma ikinci hissənin əvvəlindəki arxayınlığımız nəticəsində rəqib bizi cəzalandırdı. Şadam ki, hər şeyə rəğmən, sonda qələbə qazanan biz olduq. Çalışacağıq ki, bundan sonra daha yaxşı oynayaq.
- Bu, sizin "Bakı" ilə Premyer Liqadakı debüt matçınız oldu...
- Çox şadam ki, debütümü özümə doğma olan klubumda etdim. Bu günü heç vaxt unutmayacağam. Etiraf edim ki, oyundan öncə mənə meydana çıxacağımı bildirmişdilər. Hesab 1:1 olanda meydana çıxdım. Deməzdim ki, oyunun taleyini mən dəyişdim. Amma bütövlükdə, debütümün uğurlu alındığını düşünürəm. Çox çalışdım, hətta qol da vura bilərdim. Bundan sonra əsas hədəfim əsas heyətdə möhkəmlənmək olacaq. İnanıram ki, buna nail olacam.
- "Lans"da niyə qalmadız?
- Bu barədə hərə bir söz deyir. Guya məni orada bəyənmədiklərinə görə götürməyiblər. Amma mən səmimi danışacam. Hazırda hələ 18 yaşım tamam olmayıb. Azərbaycan vətəndaşı olduğuma görə, hələ Fransa klubu ilə müqavilə imzalamağım mümkünsüzdü. Gələn il, iyulun 1-də 18 yaşım tamam olacaq. "Lans"la da həmin vaxt müqavilə imzalayacam.
- "Bakı" bu kluba keçidinizə razıdı?
- Bizim klub həmişə futbolçularının xarici komandalarda oynamasının tərəfdarı olub. "Baş məşqçi buraxmır" kimi söhbətlər hamısı yalandı. İbrahim Uzunca da futbolçuları düşünür. O, şəxsən mənə elə bir söz deməyib.
- Sizcə, "Bakı"da əsas heyətdə oynamaq daha yaxşıdı, yoxsa "Lans"ın əvəzedici heyətində?
- "Lans" olmasaydı, mən indi "Bakı"nın əsas heyətində oynaya bilməzdim. Orada olduğum müddətdə böyük təcrübə topladım. Əlbəttə, təəssüf ki, "Lans"da qala bilmədim. Amma başqa bir məqam da var. Burada əsas heyətdə oynasam, "Lans"a getmək şansım da çoxalacaq.
- "Lans"da sizə nə dedilər?
- Orada əsas komandaya qədər yüksələcəyimə inanırlar. Fiziki cəhətdən uduzmuram, texniki baxımdan çoxlarından yaxşıyam. Amma orada "texnika"ya az diqqət yetirirlər. yeganə vaxt aparan məqam adaptasiya ilə bağlı olacaq. Buna baxmayaraq, orada olduğum müddətdə 4 oyunda meydana çıxdım, hamısında da qol vurdum.
- Sizin sözlərinizdən belə çıxdı ki, "Lans" sizin yolunuzu gözləyir?
- Bəli. Onlar hələ də mənimlə maraqlanırlar.
- Hansı komandada özünüzü daha xoşbəxt hiss edirsiz?
- "Lans"a dəvət olunmağıma, məni bəyənmələrinə çox sevinirəm. Əlbəttə, "Bakı"da mənə daha rahatdı. Çünki vətənimdəyəm. Fransız dilini bilsəydim, mənə orada da rahat olardı. Orada bütün fikrim futbola yönəlir. Azərbaycanda da istedadlı futbolçuların olduğunu bütün dünyaya göstərmək istəyirəm.
