Maksim Medvedev: İnter olmasaydı, Neftçiyə qarşı pis də oynaya bilərdik
"Qarabağ"ın müdafiəçisi Maksim Medvedevin azerisport.az saytına müsahibəsi
- Milan "İnter"i ilə oyundan nə gözləyirsiz?
- Ora mübarizə aparmaq üçün gedirik. Rəqibin gücünü bilirik. "Qarabağ" Avropada yeni oynamağa başlayıb. Amma "İnter" az qala bütün avrokubokların iştirakçısıdı. İstənilən halda Milana gəzməyə getmirik.
- "Neftçi" "İnter"lə heç-heçə oynamışdı (2:2). "Qarabağ" da eyni uğuru təkrarlaya biləcək?
- O vaxt "Neftçi" çox sakit və sərbəst oynamışdı. Onların itiriləsi heç nəyi yox idi. Çempionatda da özlərini inamlı göstərirdilər. Rəşad Sadıqov da əla qola imza atmışdı.
- Çumbinyo və Danilo Diasın yoxluğu nə dərəcədə hiss olunacaq?
- Onlar bizim aparıcı futbolçularımızdı. Amma onların yoxluğunu hiss etdirməməliyik.
- Rəşad Sadıqov da oynaya bilmir. "Neftçi" ilə oyunda onsuz çətin olmadı?
- Ağrıları olduğundan oynaya bilmir. Fikrimcə, Admir Teli inamlı çıxış etdi.
- Azərbaycan derbisi barədə də fikirləriniz maraqlıdı...
- Oyun yaxşı hazırlamışdıq. İtkilərimiz olsa da, meydana qələbə üçün çıxmışdıq. Ehtiyatlı oynamağa çalışırdıq. Çünki "Neftçi" təhlükəli rəqibdi. Onlarla açıq futbol oynamaq qorxuludu. Bundan sonra da oxşar nəticələr qazanacaq gücdəyik.
- Qarşıda "İnter"lə oyun olmasaydı, derbidə daha çox güc sərf edərdiz?
- Ola bilsin ki, daha pis oyun sərgilərdik. Sadəcə, indi biz özümüzü qorumağa çalışırıq.
- Buraxılan qol arxayınlıqdan irəli gəlirdi?
- Bəli. Düşündük ki, qapıçı topa çıxacaq və götürəcək. Amma Nfor həmin epizodda sona kimi oynadı.
- Riçard Almeydanın əvəzlənməsi nə ilə əlaqədar idi?
- Ona qarşı çox kobud oynayırdılar. Buna görə də baş məşqçimiz onu qorumağı düşündü.
