Ağabala Ramazanov: Berti Foqts çağırsa, hazıram!

"Xəzər Lənkəran"ın hücumçusu Ağabala Ramazanovun azerisport.az saytına müsahibəsi

- "Qəbələ" ilə oyundan nə gözləyirsiz?
- Bütün oyunlarda qələbə qazanmaq olar. Bu oyuna da qələbə üçün çıxacağıq. Başqa çıxış yolumuz yoxdu. Amma təbii ki, çətin olacaq.

- "Araz Naxçıvan"la son oyundakı qələbə sayəsində "Xəzər Lənkəran"ın işlərinin düzəldiyini demək olar?
- Mənə elə gəlir ki, belə də olacaq. Bizim çox güclü heyətimiz var. Sadəcə, lazım olan nəticələri qazana bilmirik.

- Naxçıvanlılarla oyundan razı qaldız?
- Bəli. Yaxşı hazırlaşmışdıq. Ondan əvvəlki oyunlarda qeydə alınan nəticələrimiz ürəkaçan deyildi. Ona görə də qələbə qazanmağa borclu idik. Əsas da odu ki, buna nail olduq. Sadəcə, qolu çox gözləməli olduq. Bütün oyunu hücumda keçirdik. Rəqib isə ancaq müdafiə olunurdu.

- Razılaşın ki, gözlənilən qələbə idi?
- Yəqin ki, çoxları bizim bu oyunda çox qol vuracağımızı gözləyirdi. Amma etiraf edim ki, özümüz də bu oyunda qələbədən başqa nəticə barədə düşünmürdük.

- Hər iki qolda sizin payınız oldu. Öncə qol ötürməsi etdiz, sonra özünüz fərqləndiz...
- Buna çox sevindim. Ancaq əsas odu ki, qələbə qazandıq. Mənim üçün kimin qol vurmasının fərqi yoxdu. Bu qələbə bizim motivasiyamızı daha da gücləndirməlidi.

- Komandanın indiki durumundan razısız?
- Əlbəttə. Amma biz daha yaxşı vəziyyətdə olmalıyıq. Sadəcə, bəzi oyunlarda bəxtimiz gətirməyib. İnanıram ki, bizdə hər şey qaydasında olacaq.

- Artıq U-21-lə seçmə mərhələyə yekun vurmusuz. Əsas milliyə dəvət gözləyirsiz?
- Yığmaya dəvət almaq üçün bütün gücümü qoyacam. Əgər millinin baş məşqçisi Berti Foqts mənə dəvət göndərsə, millidə layiqli çıxış etməyə hazıram.