Georgi Nikolov: İnterin üstünlüyü büdcəsini düzgün idarə etməkdədi
"İnter"in prezidenti Georgi Nikolov azerisport.az saytına müsahibəsində paytaxt təmsilçisinin 10 illik yubileyindən söhbət açıb, komandasının hədəflərindən danışıb:
"10 il az müddət deyil. Zaman sürətlə keçir. 8 ildi kluba rəhbərlik edirəm. Bu illərdə nə dərəcədə faydalı olmuşuq, buna siz qərar verin. Amma "İnter" hazırda ölkənin ən titullu klublarından biridi".
"20 illik yubiley zamanı klubun başında olub-olmayacağımı deyə bilmərəm. Əgər olmasam belə, fəxri qonaqlardan biri olaram".
Nikolov klubun geridə qalan dövrdəki uğurlarından da danışıb: "Maraqlı statistika var. Bizim iki dəst medalımız var. 10 il üçün normal nəticədi. Həmçinin digər yaş qrupları üzrə də müxtəlif çempionluqlarımız var".
Bolqarıstanlı mütəxəssisin sözünə görə, "İnter"in əsas hədəfi Azərbaycanı avrokuboklarda uğurlu təmsil etməkdi: "Əsas arzumuz Avropa arenalarında uğurlar qazanmaqdı. Daxili çempionatda özümüzü yaxşı tərəfdən göstərə bilirik. Bunu ölkədən kənarda da təkrarlamalıyıq".
Nikolov klubun büdcəsini açıqlamaq istəməyib: "Normal büdcəmiz var. Hər şey puldan asılı deyil. Baxmayaraq ki, pul çox şeyi həll edir. Əsas olan mövcud büdcəni düzgün idarə etməkdi. Onu daha da artırmaq isə bizim sponsorların qərarıdı".
Klub prezidenti komandanın cari mövsümə yaxşı başlamasından da danışıb: "Biz həmişə çempionluğa çalışmışıq. Bəli, "İnter" indi liderdi. Amma bu, bizim birinci pillədə qalacağımıza zəmanət vermir. Hər halda hədəfimiz məhz zirvədəki yerimizi qorumaqdı".
