Qadjev: Azərbaycanın 3-cü olmaq şansı yoxdu

Futbol üzrə Bolqarıstan yığmasının futbolçusu Vladimir Qadjevin azerisport.az saytına müsahibəsi

- Bakıdan hansı təəssüratlarla qayıtdız?
- Gözəl. Yaxşı oyun keçirdik. Asan olmasa da, qələbə qazandıq. Azərbaycan yığmasının güclü olduğunu düşünürdüm, amma belə olmadığını gördüm.

- Yəni, asan qələbə qazandız?
- Məncə, hə. Özü də əsas heyətimizin üç futbolçusu yox idi. İvelin Popov, İvan İvanov da olsaydı, biz daha yaxşı oynayardıq.

- Qarşıda Xorvatiya ilə oyununuz var...
- Bakıdakı qələbə bizə əlavə əminlik qazandırdı. Əgər Azərbaycandakı kimi oynaya bilsək, xorvatlara da qalib gələ bilərik. Amma daha yaxşı oynamağa, top saxlamağa borcluyuq.

- Sizcə, Azərbaycan yığması doğrudan zəifdi, yoxsa komandanız daha güclü oynadı?
- Ötən mövsüm komandanız daha yaxşı çıxış etmişdi. Amma bizimlə oyun zəif təsir bağışladılar.

- Millimizə İtaliya ilə səfər oyununda şans tanımırsız?
- Komandanız bu oyunda böyük çətinliklə üzləşəcək. Qoy güclü olan qalib gəlsin. Məncə, Azərbaycan yığmasından sensasiya gözləməyə dəyməz.

- Üçüncü turda sizi Norveçlə, Azərbaycanı Xorvatiya ilə görüş gözləyir. Hər ikisi də səfərdə...
- Biz hər oyunda qələbə üçün çalışacağıq. Xorvatlar bizimlə oyunda çox güc sərf etsələr, Azərbaycanla oyuna yorğun çıxacaqlar. Yığmanız bizə qarşı oynadığı kimi çıxış etsə, nəyə nail olacağını deyə bilmərəm. Mən sensasiya gözləmirəm.

- Yəni, 3-cü yeri tutmaq şansımız yoxdu?
- 3-cü yer? İnanmıram. Qrupda hamı güclüdü. Biz də 2-3-cü yerlər üçün  oynayırıq. Fikrimcə, Azərbaycanın 3-cü olmaq şansı yoxdu. İstənilən halda hər bir rəqibə hörmətlə yanaşırıq.