Elnur Allahverdiyev: Bizə Qarabağla oyunda yalnız qələbə sərf edəcək

"Neftçi"nin müdafiəçisi Elnur Allahverdiyevin azerisport.az saytına müsahibəsi

- "Qarabağ"la oyuna hazırlıq necə gedir?
- Hər şey yaxşıdı. Bizi ciddi sınaq gözləyir. Rəqibi yüksək qiymətləndiririk. Amma biz də zəif komanda deyilik. Maraqlı oyun olacaq. Qoy güclü qalib gəlsin.

- Bu oyun "Qarabağ"ın Avropa Liqasının qrup mərhələsi çərçivəsində İtaliya "İnter"i ilə qarşılaşması öncəsi baş tutacaq. Bu, "Neftçi" üçün üstünlük sayıla bilər?
- "Qarabağ"la "Neftçi" arasındakı oyunlar həmişə prinsipiallığı ilə seçilib. Kimin meydana çıxmasından asılı olmayaraq, bizə asan olacağını düşünmürəm. Rəqibi doğma meydanda qəbul edəcəyik. Bu üzdən istənilən halda bizim üçün yalnız qələbə qazanmaq lazımdı. Başqa nəticə sərf etməyəcək.

- Bundan əvvəlki oyunda əvəzləndiz. Qarşıdakı oyunda meydana çıxacaqsız?
- Mən özüm əvəzlənməyimi istədim. Çünki əzələmi dartmışdım, ağrı hiss edirdim. Vəziyyətin daha da ağırlaşacağından çəkinirdim. Risk etmək istəmədim. İndi özümü daha yaxşı hiss edirəm və oynamağa hazıram.

- "Neftçi"dəki debütünüz keçmiş komandanız "Qəbələ"yə qarşı oldu...
- Bu, mənim üçün xoş oldu. Özümü heç də qonaq kimi hiss etmirdim. Məni Qəbələdə yaxşı qarşıladılar.

- Bu, seçmə mərhələ oyunları öncəsi son turdu. Yığmamızın İtaliya və Xorvatiyaiə görüşlərinə dəvət gözləyirsiz?
- Bəli. Məni də dəvət edəcəklərinə inanıram. Berti Foqtsa belə oyunlarda təcrübəli futbolçular lazımdı. Bir əsgər kimi mən də hər an dəvətə hazıram.

- Bu oyunlarda yığmamızın yaxşı nəticə qazanacağına inam çox azdı. Bunu nəzərə alsaq, yığmaya çağırılmamaq daha yaxşı olmazdımı?
- Mən istənilən halda bu oyunları buraxmaq istəmirəm. Yığmamız bu oyunlara uduzmaq üçün getməyəcək. Bizim hər iki oyunda şansımız var.