Matiya Şpiçiç: Çempion olacağımıza çox inanırıq
"İnter"in müdafiəçisi Matiya Şpiçiçin azerisport.az saytına müsahibəsi
- "Bakı"ya 7:0 hesabı ilə qalib gəldiz. Nə baş verdi bu cür hesabla qələbə qazandız?
- Bu oyuna çox ciddi yanaşırdıq. Bilirdik ki, "Bakı"nın vəziyyəti heç də yaxşı deyl. Onlarda problemlər olduğunu hamımız bilirdik. Buna baxmayaraq, oyuna çox ciddi çıxdıq. İlk dəqiqələrdən də niyyətimiz qol vurub oyunu öz tərəfimizə keçirmək idi. Layiqli qələbə qazandıq və böyükhesablı qələbə yerinə düşdü.
- Hesab daha dəhşətli ola bilərdi. 5-10 yüzfaizli qol epizodunu da boşa verdiz. “Bakı”ya heç acımadız?
- Bəli, bizim qol vurmaq üçün çoxlu sayda imkanımız oldu. Ancaq alınmadı. Epizodların hamısı qol olsa, futbolun marağı olmaz. Hər oyuna qələbə üçün çıxırıq. Əlbəttə ki, 7:0 bizim üçün əla nəticədi. Özümüzəinam daha da artdı. Qarşıdakı görüşə də daha yaxşı motivasiya ilə çıxacağıq.
- Matçdan sonra "Bakı" futbolçularına yaxınlaşıb nəsə dediz?
- Əlbəttə, yaxınlaşdım. "Bakı" üçün heç də yaxşı gün deyildi. Bu cür məğlubiyyət onları çox pis vəziyyətə salmışdı. Balkandan olan dostlarıma yaxınlaşdım və dedim ki, bu oyunu unutmaq lazımdı. Hamısı başını aşağı salmışdı. Mən də dedim ki, başınızı qaldırın və irəliyə, baxın hər şey yaxşı olacaq. Onlar da futbolçu dostlarımızdı. Pis olmalarını istəməzdim. Sadəcə, bu, futboldu və bizim öz məqsədimiz var. Ən azından onlara dəstək olduq.
- "İnter" ilk pillədədi. Bu mövsümə çox yaxşı başlamısız. Cari mövsüm "İnter"dən çempionluq gözləmək olar?
- Düzdü, mövsümə çox yaxşı başlamışıq. Hələ ki, ilk pillədəyik. Biz komanda olaraq əminik ki, bu il çempionluq uğrunda mübarizə aparmaq olar. Çempionluğa da çox inanırıq.
- Hansı klubları "İnter" üçün əsas rəqiblər saymaq olar?
- Elə keçən ilki kimi ən çətin rəqiblərimiz "Qarabağ", "Neftçi", "Qəbələ" və "Xəzər Lənkəran"dı. Bu rəqiblərlə matçlar çətin olacaq.
- Demək olar ki, "İnter"ə hücumçu lazımdı?
- Ötən mövsüm də hamı deyirdi ki, "İnter"ə hücumçu lazımdı. Ancaq biz "Qarabağ"dan sonra çempionatda ən çox qol vuran komanda olduq. Bu mövsüm də artıq 16 qol vurmuşuq. Ona görə də hücumçu lazım olduğunu düşünmürəm. Sadəcə, bizim problemimiz epizodları qola çevirməkdədi. Biz bunda haradasa əziyyət çəkirik.
- Ötən mövsüm vacib oyunlarda "İnter"in vacib qollarını vururdun və əsas heyətin əvəzedilməzi idi. Ancaq cari mövsüm hərdən elə olur ki, ehtiyatda oturusan. Bu nə ilə bağlıdı?
- Bilmirəm. Baş məşqçi qərar verir kimin oynayacağına. Mən hər zaman hazıram və baş məşqçidən şans gözləyirəm. Sadəcə, bizdə legionerlər çoxdu. Start heyətində isə yalnız 6 legioner oynaya bilər. Ona görə də baş məşqçimiz hərdən heyəti dəyişir. Burada problemli bir şey görmürəm.
- Növbəti tur AZAL-ın qonağı olacaqsız. Uğurlu seriyanı davam etdirə biləcəksiz?
- Hər oyuna qələbə üçün çıxırıq. AZAL-la oyuna da həmçinin. Ümidvaram ki, "Bakı" üzərindəki böyükhesablı qələbədən sonra AZAL-la görüçdə motivasiyamız yüksək olacaq və qələbə qazanacağıq.
- "Qarabağ" - "Sent Etyen" matçını izlədiz?
- İkinci hissəyə baxa bildim. Çünki məşqimiz var idi. Heyf ki, "Qarabağ" qalib gələ bilmədi. Çox yaxşı qol epizodları var idi. "Sent-Etyen" heç nə edə bilmədi "Qarabağ" qarşısında. Əgər "Qarabağ" bu cür oyunu davam etdirsə, digər rəqiblərlə matçda da uğurlu nəticə qazanar. Qrupdada yüksək yerlər üçün oynayar.
