Muarem Muarem: Biz 200 azarkeş qarşısında da oynamağa hazır olmalıyıq
"Qarabağ"ın yarımmüdafiəçisi Muarem Muaremin azerisport.az saytına müsahibəsi
- "Simurq"la oyunda çətinliklə də olsa, qələbə qazandız. Oyunu necə şərh edərdiz?
- Oyun həqiqətən çox çətin alındı. Buna öncədən də şübhə etmirdik. Amma qələbə qazanmağa borclu olduğumuzu başa düşürdük. Biz istər Avropa Liqasında, istərsə də Premyer Liqada hər bir oyunda qələbə qazanmağa borcluyuq. "Simurq"la oyunlarımız həmişə çətin keçir. Ötən mövsüm çempion olsaq da, "Simurq"a nə qalib gəlmişdik, nə də qol vurmuşduq. Son oyunda hətta uduzmuşduq. Düzdü, revanş almaq barədə düşünmürdük. Sadəcə, qələbə qazanmaq istəyimiz vardı. Öz istəyimizə nail olduq, bu klubla oyunlardakı uğursuz gedişata son qoyduq. Çünki turnir cədvəlində irəliləməyimiz də vacibdi.
- "Sent-Etyen"lə oyundan sonra "Simurq"la oyunda yorğunluq olacağı gözlənilirdi...
- Yaxşı komandamızda çoxlu futbolçu var. Qurban Qurbanov öz işini bilir. O, "Simurq"la oyunda ehtiyat qüvvəni buraxdı. Baş məşqçi kimə şans verirsə, o da oynayır. "Qarabağ"ın futbolçuları hər bir oyunda oynamağa hazırdı. Məsələn, mən fransızlara qarşı da oynadım, "Simurq"a qarşı da.
- Problem olmadı?
- Fiziki cəhətdən bir qədər problemlidi. Çünki oyun çox sürətli alındı. Xüsusilə də ikinci yarı.
- "Sent-Etyen"lə oyunda 30 min azarkeş olduğu halda, çempionat görüşündə cəmi 200 azarkeş vardı. Bu, sizi üzmür?
- Biz peşəkar futbolçularıq. Hətta az azarkeş də gəlsə, çıxıb oyunumuzu göstərməliyik. Biz belə olan halda nə edə bilərik ki?
- Bu, futbolçulara təsir etmir?
- Əlbəttə, təsir edir. Amma bu, normal haldı. Düzünü deyim ki, buna artıq alışmışıq.
- "Qarabağ" çempionatda bir, Avroliqada digər heyətlə mübarizə aparır. Bu, komanda üçün problem yaratmır?
- "Simurq"a qarşı 8 yerli futbolçu meydana çıxmışdı. Xüsusi bir problem yox idi. Şadam ki, yerli futbolçular kifayət qədər güclüdülər.
- Son iki oyunda qol vurmaq üçün əla şanslar olsa da, yararlana bilmədiz...
- Oyuna daha yaxşı kökləmək lazımdı. Qol epizodları zamanı fəal olmaq lazımdı. Ümid edirəm ki, növbəti görüşlərdə daha yaxşı oynayacam.
