"Neftçi matçının ciddiliyini yaxşı başa düşürük"
Topaz Premyer Liqasının 6-cı turunda “Qəbələ” “Neftçi” ilə qarşılaşacaq. Azerisport.az xəbər verir ki, “Qırmızı-qaralar”ın təcrübəli futbolçusu Ruslan Əmircanov paytaxt təmsilçisi ilə Qəbələdə keçiriləcək görüş haqda fikirlərini klub saytına açıqlayıb:
“Neftçi” ilə oyunöncəsi komandada əhval-ruhiyyə əladı. Oyuna yaxşı hazırlaşmışıq. Yalnız rəqibin oyununun təhlili qalıb. Düzdü, “Neftçi”nin oyunlarını, epizodlarını izləmişik. Amma bir daha təhlil edib, güclü və zəif tərəflərini daha dərindən öyrənəcəyik. Özüm də bu komandada oynamışam, onlara qarşı da çıxış etmişəm. Amma yeni oyunçuları olduğundan belə təhlil zəruridi. Rəqib güclü komandadı. Baş məşqçi dəyişikliyindən sonra da “Xəzər Lənkəran” kimi rəqibə qalib gəlib. Son oyunda biz də qalib gəlmişdik. Bu da ab-havaya müsbət təsir edir. Amma həmin görüşü unudub, qarşıdakına köklənmişik. Hamımız matçın ciddiliyini yaxşı başa düşürük. Doğma meydanda oynayacağıq. Növbəti qələbəmizlə azarkeşlərimiz sevindirməyə çalışacağıq”.
