Kristof Qalte: Qarabağ bizdən daha təcrübəlidi
Fransanın "Sent-Etyen" klubunun baş məşqçisi Kristof Qalte Avropa Liqasının qrup mərhələsi çərçivəsində "Qarabağ"a qarşı keçirəcəkləri oyun öncəsi fikirlərini açıqlayıb. Azerisport.az sizi fransız mütəxəssisin mətbuat konfransından hazırlanmış reportajla tanış edir:
- Avroliqada hədəfiniz nədən ibarətdi?
- Biz Fransa çempionatında mövsümə yaxşı start vermişik. Avroliqada da eyni dərəcədə uğurlu çıxışımızı davam etdiririk. Avroliqa təcrübə toplamaq baxımından bizim üçün vacibdi.
- Oyuna necə hazırlaşmısız?
- Yaxşı. Komanda əla vəziyyətdədi. Əlimizdən gələni edəcəyik ki, uğurlu nəticə qazanaq. Heyətdə zədəli futbolçularımız var. Onları meydana buraxmaqla riskə yol vermək istəmirik.
- Rəqib haqda nə deyə bilərsiz?
- Bizim nümayəndəmiz onların son çempionat oyununda olub. Digər oyunlarının da videoyazılarına baxmışıq. "Qarabağ" bizdən daha təcrübəlidi. Onlar ölkə çempionu olublar. Biz isə çoxdandı belə bir uğur qazana bilmirik. Ağdamlıların futbolçuları yığma komandalarda çıxış edir. Çox faydalı braziliyalıları var.
- "Sent-Etyen" Fransa çempionatında çıxış edir. "Qarabağ" sizdən necə təcrübəli ola bilər ki?
- Onların avrokubokların son mövsümlərində çoxlu qələbələri var. Bu, vacib təcrübədi. Amma rəqibin avrokuboklardakı müsbət statistikası bizi qorxutmur. Biz öz oyunumuzu göstərməyə çalışacağaıq. Qələbə qazanmaq istəyirik.
- Bəs necə futbol oynamağı düşünürsüz?
- Bunu deyə bilmərəm (gülür). Avropa Liqasında heç kim açıq futbol oynamır.
- "Böyük beşlik" ölkələrinin təmsilçiləri bir qayda olaraq, Avroliqaya çox da böyük önəm vermir. Sizdə də belədi?
- Bu turnir bizim üçün maraqlıdı. Pley-off mərhələsinə çıxmaq üçün mübarizə aparacağıq. Bunu siz də görəcəksiz.
- Bakıda uduzsaz, bunu normal qəbul edəcəksiz?
- Mən buna çox məyus olaram. Heç kim uduzmağı istəməz.
- Siz "Qarabağ"ın 20 ildən çoxdu Ağdamda oynamadığından xəbərdarsız?
- Mən siyasətə qarışmaq istəmirəm. Amma futboldan danışa bilərəm.
