Saşa Stamenkoviç: Rauf Əliyevə toxunmamışdım, hakimin qərarından narazıyam
"Neftçi"nin qapıçısı Saşa Stamenkoviçin azerisport.az saytına müsahibəsi
- "Böyük oyun"la bağlı nə deyə bilərsiz?
- Çətin oyun alındı. Bilirdik ki, asan olmayacaq. Vurulacaq bir qol oyunun taleyini həll edə bilərdi. XL çempionatda nə qədər yaxşı çıxış etməsə də belə, onlarla oyunlarımız həmişə çətin olur. Şadam ki, prinsipial rəqibimizə qalib gələ bildik.
- Siz Rauf Əliyevə qarşı sonuncu ümid foluna görə oyunu erkən tərk etməli oldunuz...
- Mən orada qaydanı pozmamışdım. Ona görə də həmin epizodda penalti və qırmızı vərəqə yox idi. Uşaqların sayəsində azlıqda olmağımıza baxmayaraq, qələbə hesabını qoruya bildik.
- Yəni hakimin qərarı səhv idi?
- Mən Raufa heç toxunmamışdım. O, özü mənə toxundu. Həm də Karlos Kardoso yanımızdaydısa, orada hansı sonuncu ümid folundan söhbət gedə bilər? Hakimin qərarı ilə razı deyiləm.
- Sizi əvəzləyən Pavel Doroşevin oyunu haqda nə deyə bilərsiz?
- O, təcrübəli qapıçıdı. Bir neçə epizodda komandamızı qoldan xilas etdi. Fikrimcə, komandamızın növbəti oyunlarında da qapı baxımından problemi olmaz.
- "Neftçi" artıq qələbələri sıralamağa və liderlər qrupunda məskunlaşmağa başlayıb...
- Avropa Liqasında mübarizəni dayandırandan sonra bizim başqa bir işimiz qalmayıb. Ona görə də ölkə daxilindəki turnirlərdə mümkün qədər yaxşı çıxış etməyə çalışacağıq.
