Cahangir Həsənzadə: XL-in Neftçi ilə oyunda bəxti gətirmədi

“Xəzər Lənkəran”ın qapıçısı Cahangir Həsənzadənin azerisport.az saytına müsahibəsi

- “Neftçi”yə məğlub olduz. Bu oyun haqda nə deyə bilərsiz?
- Çətin oyun oldu. Təəssüf ki, bu görüşdə uğur bizim tərəfimizdə olmadığı üçün məğlub olduq.

- Sizcə, prinsipial oyunda məğlubiyyətə nə səbəb oldu? Çünki rəqib azlıqda oynayırdı...
- Əslində, hər şey normal idi, bərabər mübarizə apardıq. Sadəcə, qol vura bilmədik. Penaltini də qaçırdıq. Halbuki, həmin penalti qol olsaydı, bu, komandamıza çox kömək edərdi, hətta qələbə də qazana bilərdik. Amma alınmadı. 

- Görünür, məhz penaltini qaçırmağımız komandaya təsir etdi.
- Razıyam. Həmin epizod komandaya mənfi təsir göstərdi. Uşaqlar mümkün qədər tez hesabı bərabərləşdirmək istəyirdilər. Amma bacarmadılar. Məncə, bizim bu görüşdə bəxtimiz gətirmədi. 

- Demək olar ki, hücum xəttiniz dişsizdi?
- Xeyr, yaxşı səviyyəli futbolçularımız var. Sadəcə, qol epizodlarından lazımınca yararlana bilmirik.

- Flavinyonun qolu zamanı komandanızı qoldan xilas edə bilərdiz?
- İndi dəqiq bir söz deyə bilmərəm. Həmin epizodun təkrarına baxmalıyam. “Neftçi” təsadüfi qol vurdu.

- Sizcə, komandanın qeyri-sabit çıxışına səbəb nədi?
- Deyə bilmərəm. Mənə elə gəlir ki, bizim futbolun özü qeyri-sabitdi. İstənilən klub həm uduza, həm də qələbə qazana bilər. Yəni qeyri-sabitlik təkcə bizdə deyil.