Yaşar Seyidov: Bakı növbəti oyuna çıxacaq
"Bakı" klubunun vitse-prezidenti Yaşar Seyidov azərisport.az saytına açıqlamasında komandada maddi problemlərin hələ də həll olunmadığını bildirib. Seyidov həmçinin klubun bazasında olan 6 stadionun ot örtüyünün qorunmasının vacib olduğunun deyib:
"Bakı" klubunun müasir bazasında 6 təbii örtüklü stadion var. Onların ot örtüyü qorunmalıdı. Bu baza təkcə klub üçün deyil, Azərbaycan futbolu və yığması üçün hazırlanıb. Fikrimcə, belə davam edərsə, stadionun qorunması üçün müvafiq qurumlara müraciət etməli olacam. AFFA, Gənclər və İdman Nazirliyi, Milli Olimpiya Komitəsindən dəstək istəməyə çalışacam. Bu stadionlar millimiz üçün çox lazımdı. Unutmaq olmaz ki, qarşıdan Bakıda 16 yaşlılar arasında Avropa çempionatı keçiriləcək. 2020-ci ildə paytaxtımız Avropa çempionatının final mərhələsinin oyunlarını keçirmək iddiasındadı. Bu yarışlarda bizim stadionlarımız məşq meydançası kimi istifadə oluna bilər. Bir stadionun aylıq qulluğu 7 min manata başa gəlir. Üstəlik bunun kommunal xidmətləri var. Fikrimcə, kompleksdəki stadionları qorumaq üçün bizə kömək edəcəklər".
Yaşar Seyidov futbolçuların sentyabrın 10-da məşq etməkdən imtina etmələrinə də münasibət bildirdi: "Biz bütün problemləri həll etməyə çalışırıq. Ona görə hər şeyi nəzarətdə saxlayırıq. Klub məşqləri davam etdirir. Növbəti oyunda iştirak edəcəyik. Futbolçular da məsuliyyəti anlayır".
