Rauf Əliyev: Kiminlə oynayacağıma mən qərar vermirəm
Futbol üzrə Azərbaycan yığmasının və "Xəzər Lənkəran"ın hücumçusu Rauf Əliyevin azerisport.az saytına müsahibəsi
- AÇ-2016-nın seçmə mərhələsinə məğlubiyyətlə başladınız. Bolqarlarla oyun haqda nə deyə bilərsiz?
- Gözlənilməz məğlubiyyət oldu. Ən azından heç-heçə oynamalı olduğumuz oyun idi.
- Bəs məğlubiyyətə nə səbəb oldu?
- Həmişəki kimi standart vəziyyətdən qol buraxdıq. Bu, bizim ən zəif yerimizdi.
- Amma Dmitri Nazarovun cavab qolundan sonra komandamız istənilən səviyyədə hücumlar da təşkil etmədi...
- Bu elə deyil. Sadəcə, çətinliklər vardı. Rəqib müdafiədə çox yaxşı oynadı. Onların müdafiə xəttində boşluq tapmaq çox çətin idi.
- Ola bilər ki, bizim yaxşı pleymeykerimizin olmaması sözünü dedi?
- Bizə pleymeyker çox lazım idi. Onsuz oynamaq mümkün deyil.
- Belə oyundan sonra komandamız nəyə ümid edə bilər?
- İndi heç nə demək olmaz. Allah eləsin ki, hər şey yaxşı olsun.
- Rüfət Dadaşovla hücum duetiniz uğursuz oldu...
- Kiminlə oynayacağıma mən qərar vermirəm. Bu, baş məşqçinin seçimi idi.
- Reynaldo ilə yanaşı oynamağınız mümkündü...
- Reynaldo ilə birgə oynamamışam. Amma onu milliləşdirsələr, yığmamız üçün yaxşı olardı.
- "Xəzər Lənkəran"ın "Neftçi" ilə görüşündən nə gözləyirsiz?
- Hazırlaşırıq. Ancaq qələbə haqda düşünürük.
