Millimiz İngiltərə, İsveçrə və Macarıstanla bir qrupa düşdü

İtaliyanın Jesolo şəhərində təşkil olunmuş dünya çempionatının seçmə mərhələsində çimərlik futbolu üzrə Azərbaycan milli komandası növbəti mərhələyə vəsiqə qazandı. Azerisport.az xəbər verir ki, millimiz seçmə mərhələnin ilk oyununda Çexiya yığmasını 4:1 hesabı ilə məğlub etmiş, növbəti qarşılaşmada isə İspaniya komandasına 3:5 hesabı ilə uduzmuşdu. Son oyunda Bolqarıstan üzərindəki 3:2 hesablı qələbə komandamızı qrup ikincisi etdi və yığmamız DÇ-nin ikinci seçmə mərhələsinə yüksəldi.

Artıq Azərbaycanın seçmə mərhələdəki növbəti rəqibləri də məlumdu. Belə ki, yığmamız növbəti mərhələdə İngiltərə, İsveçrə və Macarıstanla qarşılaşacaq.

Qeyd edək ki, yığmamız bu mərhələdəki ilk oyununu bu gün İngiltərəyə qarşı keçirəcək.

İkinci mərhələdə mübarizə aparacaq digər komandalar aşağıdakı qruplara bölünüblər:

1-ci qrup: İtaliya, Belarus, Polşa, Estoniya
2-ci qrup: İspaniya, Ukrayna, Fransa, Türkiyə
3-cü qrup: Rusiya, Rumıniya, Almaniya, Yunanıstan.