Rəşad Sadıqov: Bizə ən çox təsir edən bu idi
Futbol üzrə Azərbaycan millisinin kapitanı Rəşad Sadıqov AÇ-2016-nın seçmə mərhələsi çərçivəsində Bolqarıstanla oyundan sonra azerisport.az saytının suallarına cavab verib.
- Millimiz növbəti dəfə seçmə mərhələyə məğlubiyyətlə başladı. Səbəb nədədi?
- İlk hissəyə yaxşı başlamışdıq. Bir neçə təhlükəli vəziyyət də yaratdıq. Sadəcə, sonradan oyuna nəzarət itirildi. Müəyyən səhvlər nəticəyə təsir etdi. Fikrimcə, futbolçular da çalışırdı yaxşı oynasın. Seçmə mərhələyə məğlubiyyətlə başlamaq çox pis oldu. Biz uduzmaq istəmirdik.
- Hesab 1:1 olandan sonra sanki komanda bununla qane oldu və nəticəni qorumağa başladı....
- Rəqib hücum edərkən biz müdafiə olunurduq. Hesab bərabər olarkən ikinci hissədə təhlükəli vəziyyətlərimiz var idi. Sonda buraxdığımız səhv məğlubiyyətlə nəticələndi. Biz bərabərliyi qorumaq barədə düşünmürdük, istəyirdik qələbə qazanaq. Azərbaycan millisi çox istəyirdi ki, qalib gəlsin.
- Milli üzvlərinin oyunu barədə nə deyə bilərsən?
- Meydanda olan futbolçular uğur qazanmağa çalışırdı. Məğlubiyyət varsa, deməli hamımız o qədər yaxşı oynamadıq. Azarkeşləri məyus etdiyimiz üçün çox pis olduq. Stadiona gələn azarkeşlər millidən uğur gözləyirdi. Onları məyus etmək istəmirdik. Ən çox bu hal bizə təsir etdi.
- Baş məşqçi Berti Foqts oyundan sonra dedi ki, komanda 70-ci dəqiqədən sonra meydanda mübarizə apara bilmədi. Fiziki hazırlıqda problem olmasıyla razısan?
- Şərh vermək istəmirəm. Baş məşqçi deyibsə, bizim nəsə deməyimiz düzgün olmaz. Sadəcə, meydanda olan hər bir futbolçu çalışırdı yaxşı çıxış etsin. Bolqarıstandan heç olmasa 1 xal almaq istəyirdik. İndi seçmə mərhələyə xalsız başlayırıq, bu bizi düşündürməlidi.
- Bu oyunla AÇ-2016-nın seçmə mərhələsində hansı nəticəyə ümid etmək olar?
- Seçmə mərhələ indi başlayır. Bu il daha yaxşı nəticə göstərmək üçün ev oyunlarında xal toplamaq vacibdi. Buna görə Bolqarıstanla oyunda qələbə istəyirdik. Onda növbəti oyunlarda daha rahat olardı. İndi digər oyunlarda xal toplamağa çalışacağıq.
- Bolqarıstan da qrupda 3-cü yerə oynayır....
- Bunu bilirdik, ona görə evdə xal qazanmalıydıq. Bu uğursuzluqdan sonra səfər oyunlarəında tam fərqli oynamağa məcburuq.
