Böyükağa Hacıyev: Ruslan Abışovun əvəzlənməsi səhv addım idi
"Neftçi"nin sabiq baş məşqçisi Böyükağa Hacıyev milli komandanın AÇ-2016-nın seçmə mərhələsində Bolqarıstanla oyunu haqda danışıb. Azərisport.az saytına müsahibəsində o, bunları söyləyib:
"Bolqarıstanla oyunda Azərbaycan yığması zəif oynadı. Milli hücuma keçmək istəyirdi, amma buna gücü çatmırdı. Qol vurmaq üçün təhlükəli vəziyyət yaratmaq lazımdı. Bu hücumlarda 5-6 futbolçu iştirak etməlidi. Amma bu sayda futbolçuyla hücum yarada bilmirdik. Fərdi keyfiyyətlər baxımından zəif idik. İrəlidə top saxlaya bilmirdik. İrəlidə top saxlamamağımız ümumi müdafiəçilərə problem yaratdı. Müdafiənin işi çox oldu. Rüfət Dadaşovun oyunu zəif alındı. Topu tez-tez itirirdi. Əlbəttə, ümumilikdə komanda zəif oynadı. Çünki, futbol kollektiv oyundu. Fikrimcə, Ruslan Abışovun əvəzlənməsi səhv addım idi. Foqts təcrübəlidi, o, daha yaxşı bilir. Amma Rüfəti çıxarmaq lazım idi. Rauf Əliyevə hücumda sərbəstlik verilsəydi, daha effektli olacaqdı. Bolqarıstanın təhlükəli vəziyyətləri çox idi. Reallığı hamı gördü. Millimiz bir qol vurdu, amma baxın görün necə qol vurduq. Nazarovun komandaya uyğunlaşmasında hələ də problem var".
