Elnur Allahverdiyev: Bu sözlərimə görə milli üzvləri məndən inciyə bilər

Futbol üzrə Azərbaycan yığmasının müdafiəçisi Elnur Allahverdiyevin azerisport.az saytına müsahibəsi

- Yığmamızın AÇ-2016-nın seçmə mərhələsi çərçivəsində Bolqarıstana məğlubiyyətini necə qarşıladız?
- Yığmamızdan daha çox şey gözləyirdim. Biz öz meydanımızda belə oynamırıq. Çox istəyirdim ki, komandamız qələbə qazansın. Amma nəticə üzücü oldu. Nəsə çatmadı. Yığmamızın bəzi üzvləri bu sözümə görə məndən inciyə bilər. Amma mən həmişəki ev oyunlarında olan istəyi görmədim.

- Bu oyunda meydanda olmağı arzuladığınız vaxt oldu?
- Mənə elə gəlir ki, meydanda olmağım komandamıza daha çox enerji qazandırardı. Neçə ildi birgə oynayırıq. Ona görə meydanda olmağı çox arzulayırdım. Mən meydanda olsaydım, qələbə qazanardıq kimi bir iddia irəli sürə bilmərəm. Amma ən azından daha yaxşı oynayardıq. Bu, mənim fikrimdi.

- Oyundan sonra Berti Foqts da sizin yoxluğunuzu önə çəkdi...
- Sağ olsun ki, mənim komandada vacibliyimdən danışıb. O, bunu deməyə də bilərdi. Foqtsun bu sözləri mənim əvvəlki formamı bərpa etməyimə çox kömək edəcək, istəyimi artıracaq.

- Amma sizi yığmaya dəvət etməmişdi?
- Neçə oyundu meydana çıxmıram, oyun təcrübəm yoxdu. Bu üzdən yığmaya çağırılmağımın mənası yox idi. Almaniyalı kimlər hazır idi, onlara dəvət göndərmişdi. Amma bu oyunu görəndən sonra düşünürəm ki, hətta indiki halımla da komandaya daha çox kömək edərdim. Bu, elə bir oyun idi ki, hər bir futbolçu meydanda bütün gücünü qoymalı idi.

- "Neftçi"yə keçidiniz nə vaxt rəsmiləşəcək?
- Mümkündü ki, elə bu gün. Tezliklə klubun bazasına gedəcəm, rəhbərliklə görüşəcəm. Ümid edirəm ki, yaxın gələcəkdə əvvəlki formamı bərpa edə biləcəm və İtaliyaya, Xorvatiyaya qarşı oyunlarda iştirak hüququ qazanacam.