Berti Foqts: Gücümüz çatmadı

Futbol üzrə Azərbaycan yığmasının baş məşqçisi Berti Foqts AÇ-2016-nın seçmə mərhələsi çərçivəsində Bolqarıstana qarşı keçirilmiş oyunu şərh edib. Azerisport.az xəbər verir ki, o, Bakıdakı 1:2 hesablı məğlubiyyətlə bağlı bunları söyləyib:

- Rəqib bizi buraxdığımız iki səhvə görə cəzalandırdı. Birinci hissədə öz oyunumuzu göstərə bilmədik. Amma sonradan daha yaxşı oynamağa başladıq. Hətta qol da vurduq. 70 dəqiqə bərabər səviyyəli mübarizə getdi. Lakin sonradan irəli getməyə gücümüz çatmadı.

- Bu nəticə ədalətlidi?
- Müdafiədə çətinliklərimiz vardı. Elnur Allahverdiyevin oyun təcrübəsi olmadığından dəvət olunmamışdı. Digər oyunçularımızda da məhz təcrübə çatmadı.

- Sizi yığmaya dəvət ediblər ki, komanda 70 dəqiqə oynasın, ya 90 dəqiqə?
- Mənim komandanı hazırlamaq üçün yalnız 10 günüm oldu. Bu da fiziki hazırlığı yaxşlaşdırmağıma bəs edə bilməzdi. Bizim klublardakı kimi üstünlüyümüz yoxdu.

- Hesab bərabər olanda siz meydana müdafiəçi, rəqib hücumçu buraxdı. Məgər heç-heçəyə oynayırdıq?
- Bəzi oyunçular fiziki cəhətdən çatdırmırdı. Amma biz buna görə uduzmadıq.

- Bu oyunla qrupda 3-cü yeri tutmaq olar?
- Bundan sonra təbii ki, çətin olacaq. Ən azından heç-heçəyə ümid edirdim. Çalışacağıq ki, növbəti oyunlarda daha yaxşı oynayaq.

- Siz hələ də bundan sonra hər şeyin yaxşı olacağına ümid edirsiz?
- Mən əlimdə olan materialdan istifadə etməyə məcburam. İşimiz çoxdu və çalışacağıq. Gənc futbolçularımıza inanıram.