Berti Foqts: Heyəti 90 faiz müəyyənləşdirmişəm

Futbol üzrə Azərbaycan yığmasının baş məşqçisi Berti Foqts AÇ-2016-nın seçmə mərhələsi çərçivəsində Bolqarıstana qarşı keçiriləcək oyun öncəsi fikirlərini açıqlayıb. Azerisport.az xəbər verir ki, almaniyalı mütəxəssis bu gün baş tutan mətbuat konfransında bunları söyləyib:

- Hazırlıqdan razıyam. Futbolçularla danışmışam. Onlar başa düşürlər ki, Rusiya ilə oyunda buraxılan səhvləri bir daha buraxmaq olmaz. 100 faiz bu oyuna konsentrasiya olmuşuq. Komanda qələbə qazanmağa qadirdi. Bacardığımızı tam olaraq göstərməliyik. Bilirik ki, komandamız gənclərdən qurulub. Şadam ki, onları yoxlama oyunlarında sınaqdan keçirmək, səhvlərimizi görmək imkanımız oldu. Bu oyunu tam səhvsiz keçirməyə hazır olmalıyıq.

- Sabah sizi ancaq qələbə qane edəcək?
- Artıq bir neçə ildi buradayam və heç vaxt komandamı heç-heçəyə hazırlamamışam. Ancaq qələbə haqda düşünürük.

- Rusiya ilə oyundan sonra azərbaycanlı mütəxəssislər sizi çox tənqid etdilər. Xüsusilə də Şahin Diniyev. O, belə hesab edir ki, Rusiya ilə oyunda Bolqarıstana qarşı oynayacaq futbolçular meydana çıxmalı idi...
- Bu suala cavab vermək istəmirəm. O, təcrübəli mütəxəssisdi. Həmkarlarım haqda mətbuatda danışmağı xoşlamıram. O, güclü məşqçidi və yəqin ki, nə demək istədiyini yaxşı bilir.

- Sabah da eksperimentlər olacaq?
- Səhv etmirəmsə, sabah biz seçmə mərhələ oyununa çıxacağıq. Bu üzdən təbii ki, eksperimentlərə əl atmaq haqda düşünməyə vaxtımız olmayacaq.

- Axı siz eksperimentləri sevirsiz. Məsələn, Rusiya ilə oyunda Maksim Medvedevi dayaq yarımmüdafiəçisi oynadırdız...
- Oyunçu olmayanda, situasiyaya uyğun addımlar atmalı oluruq. Bu, normaldı.

- Tərlan Quliyevin U-21-dən əsas yığmaya çağırılması sizin Rusiya ilə oyunda bəzi futbolçulardan narazı qalmağınıza işarədi?
- Tərlan gənc və maraqlı futbolçudu. O, müdafiənin bir neçə mövqeyində çıxış edə bilər. Rusiya ilə oyunda çox kobud səhvlər buraxdıq. Bu da mənim həmin səhvlərə bir reaksiyam hesab oluna bilər.

- Azərbaycanı bu seçmə mərhələyə daha hazırlıqlı saymaq olar?
- İnkişaf hiss olunur. Ev oyunu ilə başlayırıq. Ötən tsikl evdə evdə İsrailə qalib gələ bilmədik. Bu dəfə fərqli başlamalıyıq.

- Əsas heyətin əksər üzvləri məlumdu. Müdafiənin sol cinahında kim oynayacaq?
- Sizin kimi, mən də hələ bilmirəm. Məni hazırda üç sual düşündürür. Heyəti demək olar ki, 90 faiz müəyyənləşdirmişəm.