Stanislav Manolyev: Bakıda qələbə qazanmaq üçün xarakter göstərməyimiz lazımdı
Futbol üzrə Bolqarıstan yığmasının müdafiəçisi Stanislav Manolyev AÇ-2016-nın seçmə mərhələsi çərçivəsində Azərbaycana qarşı keçirəcəkləri oyun öncəsi fikirlərini açıqlayıb. Azerisport.az xəbər verir ki, o, sentyabrın 9-da keçiriləcək qarşılaşma ərəfəsində öncə bunları söyləyib:
"Çox ümidliyəm ki, bizim daha yaxşı oyunlarımız hələ qarşıdadı. Qol vurmağıma çox sevinəcəm. Amma əsas yüksək səviyyədə oynamaqdı".
"Baş məşqçinin Azərbaycanla oyunda məni hansı mövqedə oynatması önəm kəsb etmir. Bizim çox yaxşı oyunçularımız var və hər kəs qol vura bilər. Çox iddialıyam və mümkün qədər artıq xal toplamağımızı istəyirəm. Hədəfimiz şəxsi maraqlardan daha üstündü. Bizim üçün böyük sevinc Fransaya yollanmaq olacaq".
"Fikrimcə, biz indi daha güclü olmuşuq. Yığmada iki il öncə çıxış edən futbolçular hələ də qalmaqdadı. Bu üzdən bir-birimizi çox yaxşı başa düşürük. Amma özümüzü aldatmamalıyıq. Qrupdakı rəqiblərimiz çox güclüdülər. Hər şey özümüzdən asılıdı".
Manolyev qrup ikincisi olacaqlarına inamını ifadə edib: "İtaliya və Xorvatiya güclü heyətə malikdi. Onlara qarşı oynamaq çətin olacaq. Norveçin İngiltərə ilə oyununa baxdım. Norveçlilərlə oyuna da ciddi yanaşmağımız lazımdı. Bolqarıstan futbol tarixində yeni uğura imza atmaq istəyirik".
Bolqar futbolçunun sözlərinə görə, onları Bakıda da çətin oyun gözləyir: "Azərbaycan yığmasının bir neçə oyununun videoyazısına baxmışam. Onların çox çılğın azarkeşləri var. Rəqibə yuxarıdan aşağı baxmaq olmaz. Çətin oyun olacağına əminəm. Bakıda qələbə qazanmaq üçün xarakter göstərmək lazım gələcək. Bilirəm ki, bir neçə gün öncə Qranat, İonov və Kokorin Azərbaycan ilə yoxlama oyununda çıxış edib. Fikrimcə, biz də Rusiyadan zəif deyilik və Azərbaycan yığmasına qalib gələcəyimizə əminəm".
