Ramaldanov: Bolqarların özlərinə çox güvənmələri bizim xeyrimizədi

Futbol üzrə Azərbaycan yığmasının və "Xəzər Lənkəran"ın müdafiəçisi Rasim Ramaldanovun azerisport.az saytına müsahibəsi

- Berti Foqtsun haqqınızda dediyi fikirlərdən xəbəriniz var?
- Son oyunlarda pis təsir bağışladığım haqda dediklərini nəzərdə tutursuz?

- Bəli.
- Bunu normal qəbul etdim. Baş məşqçidi, gördüyünü deməlidi. Futbol komanda oyunudu. Əgər komandanın oyunu aınmırsa, bir futbolçunun yaxşı təsir bağışlaması da mümkün deyil.

- "Simurq"da çıxış edərkən daha yaxşı oynayırdız, nəinki "Xəzər Lənkəran"da. O dövrlə müqayisədə nə dəyişib ki?
- Xüsusi heç nə. Ola bilsin ki, Zaqatalada uzun müddət oynadığım üçün mənə daha asan idi. Lənkəranda da problem yoxdu. Amma uğursuz oyunlarımız olur. Hər bir futbolçuda eniş dövrü olur. Bütövlükdə isə "Xəzər Lənkəran"da uğursuz çıxış etdiyimi düşünmürəm.

- Düşünmürsüz ki, Foqtsun bu sözlərindən sonra millidə ehtiyatda qalasız...
- Burada ciddi bir şey yoxdu. Qoy kim güclüdüsə, o da oynasın. Əsas komandamızın qələbə qazanmasıdı. Hədəfimiz AÇ-2016-nın seçmə mərhələsini qrup üçüncüsü kimi bitirməkdi və hamımız bunun üçün çalışırıq.

- Özbəkistan və Rusiya ilə uğursuz oyunlardan sonra futbolçular özləri qrup üçüncülüyünə inanır?
- Əlbəttə, inanırıq. Yoxlama oyunları göstərici sayılmamalıdı. Seçmə mərhələdə elə oynayamayacağıq. Böyük məsuliyyət daşıdığımızı bilirik. Mən də hesab edirəm ki, Azərbaycan qrup üçüncüsü ola bilər.

- Bolqarıstan yığmasının oyunçuları çox iddialı açıqlamalar verirlər...
- Onların özlərinə belə çox güvənmələri bizim xeyrimizədi. Qoy onlar öz bildiklərini danışsınlar, biz isə öz işimizi görək.

- Sentyabrın 9-da nə olacaq?
- Əls döyüş olacaq. Tsiklin ilk oyunudu. Necə başlayacağıqsa, elə də davam edəcəyik. Ona görə də Bolqarıstana qalib gəlməliyik.